CAVALIERS NAKABAWI
Nagpakatap og 42 puntos si Kyrie Irving aron bangunon ang host Cleveland Cavaliers gikan sa pagkapandol ug pahimungtan ang Boston Celtics, 112-99, kagahapon sa Game 4 sa Eastern Conference finals sa National Basketball Association (NBA).
Ang kadaugan nagpainat sa bintaha sa Cavaliers sa best-ofseven series ngadto sa 3-1. Si LeBron James, kinsa igo lang nimugna og 11 puntos sa nakapakurat nga kapildihan sa Cavaliers sa Game 3, mibawi ug niamot kini’g 34 puntos alang sa defending champions.
Nalimitahan ang oras ni James sulod sa korte gumikan kay naangkon niini ang iyang ikaupat nga foul sa 2nd quarter.
Gumikan niini, tatawng naahat si Irving nga mas mokayod pa og maayo. “The kid is special,” matod ni James kabahin kang Irving. “I was happy to sit back and watch him. He was born for these moments.”
Ang Cavaliers, nga ningmugna og 71 percent shooting sa 2nd half, mahimo nang makabalik sa finals-- diin naghuwat ang Golden State Warriors – sa Game 5 nga ipahigayon sa korte sa Celtics ugma.
Hinuon kon ang basihan mao ang resulta sa Games 3 ug 4, dili kini sayon nga tahas alang sa Cavaliers.
Bisan wala ang ilang gamayng lider nga si Isaiah Thomas, kinsa naangol sa Game 2, ang Celtics nakapakita gihapon og saktong labaw sa milabayng duha ka mga duwa.
Sa pagpadaplin ni James, si Irving nakamugna og unom ka layups, duha ka three-pointers ug usa ka freethrow sulod lang sa dul-an sa lima ka mga minutos.
“He saw Bron went out and he wanted to put the team on his shoulders,” asoy ni Cavaliers coach Tyronn Lue. “He did that.”
Nagkanayon si Irving nga mas nadasig siyang agakon ang Cavaliers dihang iyang nakita nga nagkatiglom ang ilang poruhan sa duwa.
“In the back of my mind, I thought, ‘They can’t tie up the series’,” matod ni Irving. “We can’t go back to Boston tied 2-2. We needed everything tonight.”
Gipanguyawan ang mga sumosunod sa Cavaliers dihang gibati og sakit sa iyang tiil si Irving dihang iyang natamakan ang tiil ni Terry Rozier.
Apan wala kini nakapugong kang Irving. “It was one of those games we had to fight through and we had to earn it,” batbat ni Irving.
Si Celtics coach Brad Stevens nasagmuyo sa gipakitang depensa sa iyang mga batos ngadto kang Irving. “There’s choices,” asoy ni Stevens. “I’m not sure there are good choices. When he gets going like that, he’s tough to stop. The ones we gotta look at are the ones he got at the rim.”
Sa wala pa nagbangis ang opensa ni Irving, ang Celtics nakalabaw og 57-47 sa halftime.