BAG-ONG MUSEUMS MOABLI , APIL KARON SA 'GABII SA KABILIN'
Karong adlawa na, Mayo 26, Biyernes, alas 6 sa hapon hangtud tungang gabii ang Gabii sa Kabilin, ang ka-usa sa usa ka tuig nga kulturanhong kalihokan diin abli ang mga museyo ug mga dapit sa kabilin alang sa mga bisit. Unsa nga matang sa pagpangandam ang buhaton aron dili malingaw ug makat-on imbis mahago sa maong kalihokan?
Kaon og sakto. Dili mahimo nga walay sulod ang tiyan kay sa pagsige og lakaw basin ka makuyapan. Pagdala og kwarta aron kon gutmon naay ikapalit.
Sul-ob og hayahay nga sinina ug komportable nga sapatos. Sa Gabii sa Kabilin magsige ka og lakaw. Maong
ang isul-ob kanang haom niini.
Ampingi ang tiket. Dili magpasulod ang 27 ka mga museyo ug mga dapit sa kabilin kon walay ikapakitang tiket ang bisita. Libre ra ang mga bata siete anyos paubos basta adunay kuyog nga hingkod. Pagdala og tubig. Kay sige ka og lakaw uhawon gyud ka. Maong pagdala og tubig imbis nga mangita ka pa og kapalitan. Ayaw pagdala og daghang
butang. Dad-a lang ang kinahanglanon. Ibilin ang mga mahalong butang sama sa kwientas, ariyos, ug uban pa sa balay. Ang dad-a mao ang mga butang sama sa panyo o labakara, cellphone, tambal, ug uban pa. Ayaw kalimot sa payong basin kon mouwan.
Planoha daan ang lakaw. Dili nimo makayang adtuon ang 27 ka mga museyo ug dapit sa kabilin sulod sa unom ka oras. Planoha asa ka moadto.
Pagdala og kuyog. Walay ikatandi sa kalingaw kon kuyog ka sa imong pamilya o sa mga barkada imbis mag-inusara.
Hinay-hinay lang. Ayaw pagdali kay lagi gustong adtuon ang kutob sa mahimo sulod sa unom ka oras, kay dili motataw sa hingpit ang kaanindot sa matag usa ka museyo ug dapit sa kabilin.
Mag-inampingon. Pagbantay sa mga mangunguot. Ug pag-amping sa paglakaw kay basin na hinuon matapsingan ka og sakyanan.