2 KA BATA PATAY

NAAPIL SA SUNOG SA PINAMUNGAJAN

Naapil og kapaig ang usa ka pito ka buwan nga bata ug ang maguwang niini nga 2-anyos human naugdaw ang panimalay niini Biyernes sa buntag sa Barangay Busay, lungsod sa Pinamungajan, Sugbo.

Ang inahan sa maong mga bata, nanglaba nianang higayona hinungdan nga wa mabantayi.

Nasayran nga aduna’y gipabantay ang inahan niini nga igsuon ra usab sa maong mga bata apan nangapas kini sa sapa kon diin nanglaba ang ilang inahan.

Nailhan ang mga biktima nga sila si Irish Cabantog Papasin, pito ka buwan ug iyang igsuon nga si Jellian, 2.

Sa imbestigasyon sa Pinamungajan Police, nasayran nga pasado alas 10:00 sa buntag nahitabo ang sunog sa Purok Kalubihan, Barangay Busay.

Alas 8:30 sa buntag sa susamang adlaw dihang niadto sa sapa si Marivic Cabantog, 22, aron manglaba.

Kapin sa usa ka oras ang nakalabay dihang ang duha ka menor nga anak usab niini nangapas niya sa sapa hinungdan nga nahabilin ang pito ka buwan nga bata ug ang 2-anyos nga way nagbantay.

Samtang nanglaba si Marivic inubanan ang ubang silingan niini, aduna’y usa ka silingan nga nisyaget ug nitudlo sa itom nga aso duol sa dapit.

Sa kahadlok sa inahan, nagdali-dali siya og dagan aron susihon kay ang aso gikan sa ilang balay.

Didto na niya naabtan ang ilang panimalay nga naugdaw na nga ginama sa light materials.

Base sa imbestigasyon sa kabomberohan, nagsugod ang maong sunog dihang giingon nga nagduwa ang 2-anyos sa usa ka lighter ug nasunog ang mga senina ug nikatap sa balay.

Anaa sa P35,000 ang danyos sa maong sunog.

Dali nga gilubong ra usab ang mga lawas sa mga bata nga napaig sa Pinamungajan Municipal Cemetery. /