BABAYE GITULIS, GIPATAY SA GAMOTOR

Namatay ang usa ka babaye nga pagador human gitulis ug gipusil sa duha ka mga tawo nga nagmotorsiklo nga ning-atang kaniya gikan nga nag withdraw og kwarta sa bangko aron isweldo sa mga construction worker.

Nahitabo kini pasado alas 2 kagahapon sa hapon sa Church Drive sa may South Road Properties (SRP).

Ang patay nga nadangat sa tambalanan giila sa kapulisan nga mao si Jenelyn Aquino, 25, payroll master sa Vescon Construction.

Sa pasiuna nga inbestigasyon sa kapolisan nga gikan nag-withdraw og dakong kantidad sa salapi si Aquino sa usa ka bangko sa usa ka mall sa dapit.

Ang kwarta iyang gisulod sa backpack.

Human maka-withdraw, siya nisakay sa ilang service vehicle nga may plate number ZDY-272 nga gimaniho ni Arsenio Felboy.

Pag-abot sa dapit, bugtong si Aquino ang nikanaug sa sakyanan bitbit ang bag nga gisudlan sa kwarta nga isuweldo unta sa mga trabahante.

Apan usa ka tawo nga nag-helmet nga wa nila mabantayi ang kalit nga niduol kaniya ug dayong tukmod sa biktima dungan sa pagbunlot sa bag.

Nailog sa mao nga tawo ang bag nga gisudlan sa kwarta.

Si Aquino nga natumba ug nakalitan sa hitabo, daling nakabarug ug nisuway unta sa pagduol sa mao nga tawo nga nagkupot pa sa bag apan gipusil siya tumong sa ulo gamit ang kalibre .45 nga pistola.

Sa dihang natumba na si Aquino, daling nakadagan ang tulisan ug niduol sa naghuwat nga motorsiklo nga gisakyan sa laing tawo dayong sibat.

Pipila ka mga kwarta nga papel de bangko ang nahabwa gikan sa bag ug natagak atol sa hitabo.

Kini nagpasad sa dalan paingon sa construction site apan gibiyaan sa mga tulisan sa ilang pagdinali dali sa pagpahilayo.

Sa pagsuwat ning taho, nagpadayon ang hot pursuit operation sa Homicide Section ug Theft and Robbery Section (TRS) sa Cebu City Police Office (CCPO).

Wa isalikway sa kapulisan ang inside job tungod kay nganong nakahibawo ang tulisan sa gidala ni Aquino ug oras sa pag-abot sa dapit.

Wa pa mohatag ang kapulisan og kantidad sa nakuha gikan kang Aquino.