ANAK SA DULJO BMO NASIKOP SA PDEA

Padayon nga gisubay sa Philippine Drug Enforcement Agency (PDEA) 7 kon aduna’y kalabutan ang amahan sa usa ka dinakpan niini niadtong nakalabay nga Miyerkules sa Barangay Duljo-Fatima, dakbayan sa Sugbo.

Nasayran nga si Bernadetha Ycong Lim, 33, kinsa nasikop sa panimalay niini inubanan sa bana niini nga si Emerson Lim, 30, anak diay sa kasamtangang konsehal sa barangay Duljo Fatima nga si Ricardo “Joel” Ycong.

Nasayran usab nga si Joel Ycong mao ang pangu sa Barangay Mayor’s Office (BMO) sa maong barangay isip sinaligan ni Cebu City Mayor Tomas Osmeña.

Ang director sa PDEA 7 Yogi Felimon Ruiz nibutyag sa Superbalita Cebu nga dili pa sila makaingon nga protektor ang konsehal tungod kay wala sila’y basehan niini.

Apan matod sa director nga lakip kini sa imbestigasyon nga ilang gisusi pa karon.

Mayo 24 dihang nadakpan si Bernadetha ug si Emerson sa panimalay ni Joel diin nakuhaan kini og kapin sa 300 gramos o nagkantidad og P1 milyon.

Dugang ni Ruiz nga aduna sila’y mga pamaagi nga gisubay karon aron masuta kinsa pa ang mga kakonsabo sa managtiayon sa ilegal nga negosyo niini.

Nasayran usab nga dugay na nga nagduwa ang managtiayon sa maong ilegal nga negosyo.

Apan mismo si Konsehal Joel Ycong nipanghimakak nga anaa gihapon sa ilegal nga negosyo ang anak niini ug iyang umagad.

Giangkon hinuon niya nga niadto dihang anaa pa nagpuyo ang maong managtiayon sa lain nga sityo sa side sa iyang umagad, lakip kini sa ilegal nga negosyo apan sa kwarta ra kini nga bahin ug dili gyud sa butang.

Nipasabot si Konsehal Ycong nga tulo ka panimalay nga nagtupad ang anaa nila sa Duljo-Fatima ug anaa sa tunga ang magtiayong Lim.

Siya anaa nagpuyo sa Barangay Mambaling, sa iyang bag-ong kapuyo dihang nahitabo ang operasyon sa PDEA, Miyerkules sa kaadlawon.

Ang kapitan sa maong barangay nga si Elmer Abella sa pakighinabi niini ning mantalaan nibutyag nga anaa ra sa usa ka panimalay nipuyo ang mga anak ni Konsehal Ycong kinsa diha pud siya nagpuyo.

“Tungod sa iyang balay wa gyud siya kabadlong. Di siya kabadlong kay naa man ang negosyo sa ilaha,” si Abella nagkanayon.

Gibutyag usab sa kapitan nga dugay na sa maong ilegal nga negosyo ang magtiayong Lim. /