Merkado sa Lagtang gihimo nang suyopanan sukad naay gipabakwit

Moduso og report ang kapulisan sa Talisay City ngadto kang Mayor Eduardo Gullas labot sa giingong gihimo nang suyopanan og shabu ang wa na gigamit nga merkado sa Brgy. Lagtang.

Si Sr. Insp. Albert Quilotorio, deputy chief sa Talisay City Police Station, niingon nga human nga gihimo kining kasamtangang gipuy-an sa mga nasunogan sa barangay Tangke, ila na usab nga namatikdan nga migrabe ang suliran sa drugas sa lugar.

Gani niadtong Martes sa gabii, lain na sab nga mga tigpayuhot og ilegal nga drugas ang ilang nasikop sa maong dapit.

Apan wa nila masikop ang target nga si Veronica Caballero, alyas Nek-Nek, hingkod, nagpuyo sa maong dapit.

HInuon ang ilang nasikop mao ang kauban ni Caballero nga usa ka 17 anyos nga lalake, kinsa nakuhaan og marijuana ug si Christopher Arriba, 39, kinsa nakuhaan og ginadiling drugas.

Niadtong Lunes, usa ka Stella Cabajar, ang target sa ilang operasyon apan napakyas usab sila sa pagsikop.

Matod ni Qulitorio, ang merkado sa Lagtang gihimong evacuation center sa mga taga Barangay Tangke nga nabiktima sa sunog sa miaging buwan.

Dugang pa ni Quilitorio nga mopadala sila sa report ngadto sa Talisay City Hall aron ipahibawo kang Gullas ang situwasyon sa lugar.

Iyang gibutyag nga human nga gihimo kining kasamtangang puy-anan sa taga Tangke nga nasunogan misaka usab ang suliran sa drugas sa lugar.

Ang Brgy. Tangke dugay nang dunay dakong suliran sa drugas.

Niadtong dekada 80 ug 90, nahimo kining hagbunganan sa illegal drugs tungod kay daplin kini sa dagat.

Mga bangka nga gikargahan sa illegal drugs anha motagak sa butang sa kadagatan sa barangay.

Kini bisan sa subsub nga mga ronda sa mga awtoridad sa dapit.