Pagpa drug test himuong binuwan

Gitataw sa pangulo sa Traffic Enforcement Agency of Mandaue (TEAM) Glenn Antigua nga buot niya mopahigayon og binuwan nga surprise drug testing sa mga kawani niini.

Ang maong tahas buot nga sugdan ni Antigua sunod buwan.

“Atong buhaton sa atong personnel gud ron kay monthly napud atong drug testing nila. Mandatory pud na sa ilaha no. Monthly pero ang mahitabo ana, akoy magbuot sa petsa, di ko mosulti maong gi-surprise lang gihapon every month. At least once a month naa,” ni Antigua sa dihang nahinabi sa Superbalita Cebu.

Ang maong lakang gihimo ni Antigua human sa katapusang drug test nga gipahigayon sa TEAM diin 16 ka mga enforcer ang nagpositibo sa paggamit ug iligal nga drugas base sa resulta sa ilang test.

Nasuta ning mantalaan nga sa tanang kawani sa TEAM, adunay tulo ka mga enforcers nga wa nibutho sa surpresang drug test ug kini gikonsiderar sa buhatan nga positibo.

Kahinumduman nga ang mga nagpositibo gihatagan og hangtod niadtong Biyernes sa pagsumiter sa ilang confirmatory drug

test sa city hall ug kon positibo gihapon ilang resulta, hayan nga mataktak sila sa serbisyo.

Ang binuwan nga surpresang drug test mao usay angayang uyunan sa mga buot mosulod isip enfrocer sa TEAM, ni Antgiua.

Kini tungod kay ang mga enforcer mismo maoy mogasto sa pagpa-drug test sa ilang kaugalingon.