Recla project giplano ni Gullas alang sa Talisay
Reclamation project sa dakbayan sa Talisay hayan ipatuman sa sunod tuig, giisip nga usa sa mga dagko nga proyekto ni Mayor Eduardo Gullas sa di pa mahuman ang iyang unang termino.
Si Gullas nipadayag nga kon aduna’y reclamation project ang lungsod sa Minglanilla, hayan mohimo sab sila niini.
Kini aron maoy modugtong sa Minglanilla lahos na ngadto sa siyudad sa Naga samtang kon paingon sa dakbayan sa Sugbo, modugtong usab sa Cebu City lahos na sa Mandaue City.
Matod sa mayor nga kon mahitabo kini, dako kinig ikatabang aron maluagan usab ang dagan sa trapiko tungod kay kon adunay proyekto sa LRT, ari na unya kini mosubay sa mga reclamation nga himuon.
Ang reclamation project sa Minglanilla wa pa masugdi tungod kay gipaabot pa nila nga makuha ang Environmental Certificate Compliance (ECC) gikan sa ulohang buhatan sa Department of Environment and Natural Resources (DENR).
Ang reclamation project sa Minglanilla usa ka private public partnership.
Samtang ang dakbayan sa Naga nakigpirminirmahay na usab og Memorandum of Understanding ( MOU) sa Philippine Reclamation Authority alang gihapon sa ilang kaugalingon nga
reclamation project sa siyudad. Matod Gullas nga kon mohimo silag reclamation project, iyang siguruon nga di maapektohan ang ilang baybayon aron dili usab maigo ang panginabuhian sa mga mananagat.
Sa pasiunang plano sa mayor magsugod ang reclamation project sa barangay San Roque.
Iyang nakita nga kon matuman kini, daghang mga negosyante ang mobubo sa ilang pohunan diin ang makabenipisto mao ang taga Talisay.
Kon madayon ang proyekto, si Gullas niingon nga mas maayong masugdan kini karong sunod tuig.