Basura himuong kuryente

Usa ka Chinese nga kompaniya ang buot mohimo og feasibility study sa paghimo og waste-to-energy nga pasilidad sa dakbayan sa Mandaue isip solusyon sa nagkadakong problema sa basura sa dakbayan.

Ang Newsky Environment Co., usa ka waste-to-energy nga kompaniya gikan sa Xiamen, Fujian, China, niingon nga mohimo sila sa pagtuon nga way gasto ang kagamhanan sa Dakbayan.

Kini nagpasabot nga ang basura mahimong tinubdan sa supply sa kuryente kon mahinayon ang proyekto.

Si Mayor Luigi Quisumbing nisumiter na sa konseho sa dakbayan og draft sa Memorandum of Understanding (MOU) tali sa Mandaue ug Newsky (China) Environment Co. Ltd. nga girepresentahan sa ilang chairman nga si Chik Tsan Lam.

“Should you find everything in order, I humbly seek your usual prompt and favorable resolution for authority to sign on this matter,” ni Quisumbing sa iyang suwat sa konseho niadtong Mayo 23.

Ang proposal gi-refer mismo sa Committees on Laws and Ordinances ug sa Committee on Environmental Protection alang sa opinion niini.

Ang Newsky Environment Co. nag-operate na sa 10 ka waste to energy nga technolohiya sa nagkadaiyang dakbayan sa China ug Bangkok, Thailand.

Giangkon ni Quisumbing nga hagit sa kagamhanan ang nagtikadaghang basura sa pagtaas sa populasyon.

Base sa statistics, nitaas ngadto sa 86 porsyento kada adlaw ang solid waste sa Dakbayan.

Samtang 14 porsyento ang gikan sa non-residential nga hugaw.