Para asa man diay nang ambulance?
Gipa-ubos sa Kapitolyo sa preventive suspension ang hepe sa Minglanilla District Hospital (MDH) human mibalibad ang iyang mga staff nga gamiton ang hospital ambulance sa pagdala sa tambalanan sa usa ka tawo nga himatyon na human makasugat og vehicular accident. Si Gov. Junjun Davide mimando sa Provincial Health Office (PHO) nga imbestigahon si Dr. Bella Villagana, chief medical officer sa MDH. Gipahamtangan siya og indefinite preventive suspension.
Niadtong Miyerkules sa kadlawon, usa Marvey Bastida Cano, nakalabay og usa ka tawo nga naglunang sa dugo sa daplin sa dalan sa barangay Tunghaan, Minglanilla. Siya biktima sa vehicular accident. Gumikan sa iyang pagpakabana nga matabangan ang maong tawo, miadto si Cano sa MDH aron mangayo og panabang ug magamit ang ilang ambulance sa pag-rescue.
Apan gibalibaran si Cano sa mga hospital staff nga magamit ang ambulance kay aduna kunoy memorandum si Villagana nga magamit lamang ang ilang ambulance sa pag-transfer og pasyente sa laing hospital ug di gamiton sa rescue operation. Bisan sa iyang pag-insister sa mga staff, walay nahimo si Cano ug gisinggitan ug gi-abog pa siya sa mga staff.
Miadto si Cano sa Minglanilla police nga maoy mitabang sa biktima ug midala sa hospital apan namatay. Pastilan pagkayabag ning maong polisiya sa maong hospital. Para asa man diay nang inyong ambulance? Gitawag na og ambulance kay maoy nay gamiton kon adunay mga emergency. Gigamit kana sa pag-rescue og mga tawo nga nagkinahanglan og dinaliang panabang kay emergency. Kanang hospital to hospital transfer, normal lang apan hatagi og dinaliang pagtagad ang emergency.
Kining ubang health officers sa mga public hospitals way pagpakabana sa katawhan nga maoy ilang serbisyohan. Arogante pa nang uban ug way batasan. Daghan kaayong medical malpractice aning public hospitals kay ang ubang doctors magpataka. Kanang MDH daghan nang mga reklamo sukad pa sa una. Naa pay ubang taga hospital kusog mangurakot. Bisan ang mga medisina nga libre pabayran. Maayo unta og tinud-on ni sa gobernador .