Unahon ang kurapsyon

Mo usa na ka tuig sunod buwan sukad gisugdan sa mga awtoridad ang hugot nga kampanya batok sa ginadiling drugas human modaug sa 2016 elections si Presidente Rodrigo Duterte. Dagkong kantidad sa drugas ang nangasakmit dinhi sa Sugbo. Minilyon ang balor sa drugas nga nasakmit sa kadaghanan sa mga raid.

Matod sa Philippine Drug Enforcement Agency (PDEA), ang industriya sa illegal drugs miabot na og P120 billion matag tuig.

Sukad sa pag-asumer ni Duterte, mokabat na sa P14 bilyunes ang nasakmit sa PDEA, kun 12 porsyento pa sa balor sa drugas nga nia sa nasod, nga nag-supply sa 4 milyunes kapin ka mga drug user.

Kini nagpakita sa kadako pa sa trabahuon sa kagamhanan batok sa illegal drugs.

Usa sa mga babag nga dako sa away batok sa drugas mao ang graft and corruption sud sa Philippine National Police ug uban pang mga sanga sa kagamhanan.

Kon malimpyuhan sa kurakot o nalambigit sa illegal drugs ang mga ahensya sa kagamhanan, di layo nga molampos ang kampanya sa gobiyerno.

Ang pagkasikop sa mga pulis ug local officials nga nalambigit sa drugas, nagpakita nga ang gamot sa suliran sa drugas nagkalawom na. Nakagamot tungod sa kurap nga mga opisyal, kinsa unta mag-una sa pagpakigbatok sa illegal drugs.

Mas maayo nga mas hingusgan sa kagamhanan ang paglimpyo sa mga sanga sa kagamhanan gikan sa kurap nga mga opisyal nga nalambigit sa illegal drugs.

Sama sa tubig, kon ang tinubdan maoy sampungan, seguradong maughan ang sapa. Kon pulos lang mga durugista ang rumbuhon, magpadayon ang suliran. Kay matag tawo nga madakpan, ang mga durugista daling rang makakita og ikapuli.

Kon dunay makapuli, mobalik ra gihapon ang illegal drugs sa kadalanan. Mao ni ang nahitabo karon.