Kontrolado sa asawa

Naulahi pag-abot ang magtiayong Dante ug Nita sa ‘birthday party’ nga gisaulog alang sa inahan ni Dante nga si Nena. Sitentay singko anyos na si Nena ug napulo ka tuig na kining biyuda. Alas siyete sa gabii ang gisugyot ni Ronnie, manghod ni Dante, nga maoy ilang ipanihapon, apan alas nuybe na sila nangabot.

“Hain man si Mama?” ni Dante ngadtong Ronnie dihang nasulod na sila sa sala.

“Natulog na. Wa na kapaabot ninyo!” ni Ronnie nga malaguton.

“Ipalihog na lag hatag unya ning among regalo,” ni Dante nga mitunol sa ‘gift-wrapped’ nga karton ngadto sa iyang manghod. Gidawat kini ni Ronnie.

“Diin man diay mo?” ni Ronnie nga may pagmahay.

“Nag-asikaso pa sa negusyo,” ni Nita nga maoy mitubag.

“Mao lagi! Kontrolado man god ka sa asawa! Ang asawa mailisan, apan ang inahan, dili!” ni Ronnie, way panaganang dunay masakitan nga makadungog. Miping-it si Nita nga wa na lang motingog, apan nagpasiklap sa iyang bana.

“Ikaw! Di ka kontrolado sa imong asawa?” misinta si Dante. “Hain man imong asawa ron? Kuyog ba nimo? Wala!”

Nahilaw ang nawong ni Ronnie. “Importante tong iyang gilakaw,” ni Ronnie.

“Ayaw panginsulto aron di ka maunay sa imong insulto. Ilisi imong asawa kay way tahod sa imong inahan. Birthday god ron ni Mama. Nganong wa man siya?” ni Dante.

“Nag-estorya na man sila sa selpon. Ni-greet na man si Chona kang Mama,” ni Ronnie.

“Ah, mao diay! Kami, nagtuo ka nga wa miy selpon. Gahapon, ganihang buntag, ganihang udto. Hagbay ra ming nakig-estorya ni Mama. Sipsip ka lang ni Mama kay duna man kay giapas. Kami wala,” ni Dante nga naitok.

“Hilom na, Manoy, uy!” ni Ronnie nga nanglipaghong.

“Nakaminos ka man god sa akong asawa, kay imong asawa dako mag kita. Real Estate Broker. Pero nasayod ka bag hain imong asawa karon?” ni Dante.

“Hain man kuno, bi?” ni Ronnie nga naisa ang kilay.

“Tuas mga night club. Nag-entertain sa dagkong mga negusyante, dagkong opisyal sa gobyerno. Samtang ikaw, bilin sa balay, bantay sa mga bata!” ni Dante.

“Siya may nangita sa among kabuhian, busa siyay molakaw,” depensa ni Ronnie.

“Unya, ikaw? Wa nimo ilisi imong asawa. Pero delikado baya kon ikaw maoy ilisan ni Chona!” ni Dante.

“Ah, problema na na niya!” ni Ronnie.

“Busa, ayaw insultoha akong asawa nga sayon rang mailisan, o ako nga kontrolado sa asawa, kay ikaw mismo ug ang inyong kahimtang ni Chona di na masabot. Matawag pa ba mog magtiayon o bana’g asawa?” ni Dante.

Miduko si Ronnie. Gibutang niya ang regalo ni Dante para sa ilang Mama sa ibabaw sa lamesa. Gihatagan niyag plato, tinidor ug kutsara sila si Dante ug Nita.

“Pangaon na mo,” ni Ronnie. Gipalapos na lang niya sa iyang mga dunggan ang mga pulong ni Dante.

“Abi nakog din a lang nimo badlungon imong manghod,” hunghong ni Nita kang Dante ug mibaiid nga nagpahiyom. Nakadayeg siyag samot sa iyang bana.

“Usahay kon mapuno na ta, moawas!” tubag-hunghong ni Dante. Ug nanuol sila sa talad kan-anan.