RELIHIYON DI BABAG SA GUGMA
Kon gugma na ang molihok bisan kon managlahi ang relihiyon sa duha ka nilalang, di kini makababag.
Ang labing mahinungdanon madawat nila ang usag-usa ug anaa ang pagsinabtanay, pagdinawatay ug pagtinahoray.
Usa ka maayo nga ehemplo niini ang bag-ong kinasal nga sila si Mar Glen Tabal, 32, ug Leslie Mabini, 31.
Unang nagkaila ang duha niadtong 2011 sa usa ka waiting
shed sa Transcentral Highway sa Barangay Babag, siyudad sa Sugbo.
Nag-ulan niadtong higayona ug si Leslie nagpasilong sa
waiting shed kuyog sa iyang duha ka kaubang maestra ug maestro sa Mangabon Elementary School sa Barangay Tagbao, ning siyudad.
Naatol usab nga nagpasilong niadtong tungora si Mar Glen nga nagmaneho usab sa iyang motorsiklo.
Ang kauban nga maestro ni Leslie nga si Gregorio Arcillas ang nagpailaila nila ni Mar Glen sanglit silingan kini sa nauwahi.
Apan nilabay pa ang usa ka tuig una nabuksan ang linya sa komunikasyon sa duha ka magtutudlo.
Si Mar Glen ang unang nangayo sa cellphone number ni Leslie gikan kang Arcillas niadtong Pebrero 2012 kinsa nangita og ka- date sa Valentine's Day.
Sa sinugdanan, wa motuo si Leslie sa text message nga iyang nadawat gikan ni Mar Glen, kinsa nagpaila nga siya ang maestro nga iyang nahimamat sa waiting shed.
“Wa ko motuo nalimot ko niya ba kay wa ko ka- remember sa iyang nawong,” asoy ni Leslie.
Sa una nilang panagkita og balik sa usa ka mall sa siyudad sa Sugbo, nadani si Mar Glen sa physical nga pamarog ni Leslie. Nakagusto usab siya niini kay simple ug buotan.
Samtang si Leslie, nadani sa kataas og pamarog ni Mar Glen, kugihan ug responsabli. Sila pulos mahilig sa sports.
Si Leslie, kasamtangan nagtudlo sa Paril Elementary School, siyudad sa Sugbo, sakop sa Bradford United Church of Christ in the Philippines.
Samtang si Mar Glen, nagtudlo sa Tabunan Integrated School sa Barangay Tabunan, usa ka Romano Katoliko.
Bisan og managlahi sila og relihiyon, wa kini makababag sa ilang paghinigugmaay ug nagpabilin ang pagtahod ug kainit sa pagbati sa usag-usa.
“Bisan asa nga simbahan basta makasal lang ming duha,” pahayag ni Mar Glen.
Human sa lima ka tuig nga relasyon, nakahukom ang duha nga mosud sa kaminyuon human ni-propose si Mar Glen kang Leslie niadtong Disyembre 18, 2016. Sila nagpakasal atol sa ilang
5th anniversary isip manag-uyab niadtong Mayo 20, 2017 sa usa ka seremonya sa Bradford United Church of Christ in the Philippines sa Osmeña Blvd., dakbayan sa Sugbo.
Sa iyang wali, si Pastor Pau Conel, nangu sa seremonya, nipahinumdum sa magtiayon nga angay ipaambit ang upat ka languages sa gugma: ang pagtuo, pagsalig, physical
touch ug quality time./