PAJO NAGKAHIUSA TUNGOD SA SPORTS
Mapasigarbuong gibutyag sa kapitan sa barangay Pajo sa Lapu-Lapu City nga si Junard “Ahong” Chan nga nagkahiusa ang mga lumolupyo sa iyang ginsakupan gumikan sa paugnat sa kusog nga iyang gipasiugdahan.
Sa miaging duha ka mga semana, gipasugdan ni Chan ang pagpahigayon og sports clinics ug mga torneyo ug baguhay lang kining nahuman.
Nagsilbe kining tipik sa kasaulogan sa piyesta sa brgy. Pajo nga nakatakda karong adlawa isip pahinungod sa ilang mahal nga patron Sr. San Jose.
Gikan sa pagsugod sa kalihukan sa paugnat sa kusog, adunay sports clinics nga gipahigayon matag buntag alang sa lawn tennis, basketball, volleyball ug mixed martial arts.
Unya matag gabii ipahigayon ang torneyo sa basketball ug volleyball.
“Una sa tanan, magpasalamat ko sa atong mahal nga patron Sr. San Jose nga malampuson ang atong pagpahigayon sa atong sports events para sa atong fiesta,” matod ni Chan.
“Sa kanunay magpadayon ang atong panaghiusa alang sa kaayuhan sa barangay Pajo. Dako nakong kalipay nga nagakahiusa ug nagtinabangay ang tanan natong mga sitio para ani nga kalihukan.”
Asoy ni Ahong nga nagmalampuson ang pagpahigayon sa ilang kalihukan sa paugnat sa kusog gumikan sa kugi ni councilor Lyndel Bullos, sports chairman sa barangay.
Ang barangay Pajo nagsugod pagpahigayon og piyesta sa paninguha ni Chan gikan sa iyang paglingkod isip lider sa barangay, upat na ka mga tuig ang nakalabay.
“Sa una gud, wala’y fiesta celebration ang brgy. Pajo pero paglingkod nako as barangay captain, gipaninguha nako nga mag-celebrate mi og fiesta ug sports events,” dugang ni Chan.
“Gikan niadto, nagkabibo ang atong barangay ug nagkahiusa ang tanang sitios.”
Moabot sa 17 ka mga sitio nga gibahin sa nagkadaiyang mga distrito ang ningsalmot sa kalihukan sa paugnat sa kusog.
Ang District 2, nga gilangkuban sa mga sitio sa Pasance ug Terminal, maoy ningkampiyon sa basketball senior division.
Ang naghari sa junior division mao ang District 3 nga gilangkuban sa mga sitio sa Sina ug Sangi Interior.
Ang District 5, nga gilangkuban sa mga sitio sa Sangi ug Gusa maoy naghari sa midget division.
Sa volleyball women’s divsion, ang ningkampiyon mao ang District 1 nga gilangkuban sa mga sitio sa Seaside ug Camansi.
Ang ningpatigbabaw sa volleyball 3-on-3 division mao ang District 8 nga gisakupan sa mga sitio sa New Paradise ug Kitchen.
Sa kasaulogan sa fiesta sa Pajo karong adlawa, ipahigayon ang Palarong Pinoy sama sa palo sebo, sack race, dakop sa baktin, tubig-tubig ug uban pa.
Adunay 1,000 ka mga bata ang mosalmot niini. Ang tanang partisipante madawat og libreng hamburger, imnunon, baloons ug mga duwaan. Ang mga modaog makadawat og ganti.