4 KA OPISYAL GI-MONITOR

NARCO-POLITICS SA SAN FERNANDO

Upat ka mga opisyal sa barangay sa lungsod sa San Fernando ang gi- monitor sa kapulisan gumikan sa kalambigitan sa narco-politics.

Gawas niini, pabilin sab nga gibantayan sa kapulisan ang ubang opisyal sa naasoy nga lungsod tungod sa ilang koneksiyon sa druglord nga si Franz Sabalones.

Mao kini gibutyag ni Sr. Insp. Adrian Nalua, hepe sa San Fernando Police Station dihang nahinabi sa Superbalita Cebu.

Dugang ni Nalua, ang upat ka mga opisyal dunay barangay kapitan ug konsehal.

Nasayran kini sa kapulisan gikan mismo sa taho sa mga lumolupyo apan wala niya gibutyag ang mga ngalan sa mga gidudahang personalidad.

Sa pagpaniid sa kapulisan, nitumaw sab ang pangalan sa maong opisyal sa barangay nga dunay lawom nga koneksyon ni Franz Sabalones.

Hinuon, ang mga taho nga ilang nadawat ilang gi- validate ug naniid sa pagkakaron aron paglusad sa operasyon.

Si Nalua nipadayag nga kining upat ka mga opisyal kabahin sa halapad nga epekto sa narco-politics sa lungsod.

Giawhag niya kadto nga lokal mga opisyal nga nalambigit niini nga hunongan na nila.

Giangkon ni Nalua nga nagpabiling gihugpaan sa ilegal nga drugas ang 21 ka mga barangay sa lungsod.

Hinuon, dason niya, ang ubang opisyal sa barangay ningkooperar sa ilang operasyon.

Lakip sa nagsuporta sa kapulisan batok sa drugas mao si Mayor Lakambini Reluya uban ni Bise Mayor Fralz Sabalones.

Sa ilang 23 ka anti-drugs operations, nasikop nila ang upat ka drug pushers ug usa ka high value target.

Matod ni Nalua, pahugtan pa nila ang ilang kampanya sa pagpuhag sa narco-politics sa lungsod.

Nasayran nga gusto na usab nga ipauswag ni Presidente Rodrigo Duterte ang eleksiyon sa barangay karong Oktubre tungod sa paghari gihapon sa druglord sa daghang barangay sa nasod. /