'Hashtags for Seekers' gilusad
TAGBILARAN, Bohol - Nagsugod sa social networking site nga Facebook ang karon libro sa mga homiliya ni Fr. Harold Parilla.
Ang 'Hashtags for Seekers,' nga pormal nga gilusad kagahapon sa dakbayan sa Tagbilaran sa Bohol, dili lang alang sa kaparian apan gihimong libro aron mahaduol ang mga batan-on hilabi na ang gitawag karon nga millennials.
Matod sa publisher sa libro nga si Michael Cañares sa Creannovate Publishing, nga tungod kay nakabasa siya sa mga homily ni Fr. Parilla sa Facebook hinungdan nga didto siya nakadesider nga himuon kini nga libro. Gikan sa gatosan ka mga
homily, 49 ang napilian ug karon mabasa sa maong libro.
Unang gilusad ang maong libro sa Cagayan de Oro niadtong Easter Sunday diin kasamtangan nga formator ug lecturer si Fr. Parilla sa St. John Vianney Theological Seminary.
Mao kini ang labing una nga publication sa Creannovate Publishing.
Si Fr. Harold, lumad nga taga Clarin, Bohol, usa ka tinun-an ni Luis Antonio G. Cardinal Tagle, hinungdan nga aduna kini'y foreword ni Cardinal Tagle.
Gipasabot usab ni Fr. Parilla nga dili Hashtag for Seekers ang unang titulo sa maong libro ug tungod kay gusto ug tumong nila nga mahaduol sa mga batan-on ug millennials ang libro hinungdan
nga hashtags ang chapters o tema niini.
Tumong sa libro nga mahatagan og tamdanan kadtong aduna'y problema ug alang usab sa kadtong nanginahanglan og spiritual reflection.
Aduna'y pito ka chapters ang libro nga mapalit sa duha ka klase, full coluor sa P499 ug Greyscale sa P319.
Kasamtangan nga mapalit kini sa atubangang bahin sa St. Joseph Cathedral sa Tagbilaran o bisitaha ang www. hashtags4seekers.com alang sa dugang detalye.