Balaang Ramadan

Nagsugod sa miaging adlaw ang tinuig nga Ramadan o usa ka buwan nga puasa nga usa sa labing balaang tulumanon sa Islam, usa sa labing dako ug impluwensiyadong relihiyusong grupo sa kalibotan. Panahon karon nga ang mga Muslim o mga deboto sa pagtuo nga Islam hugot nga namalandong ug nag-ampo ni Allah, ang labawng magbubuhat.

Atong pagduyog sa mga igsuong Muslim sa tibuok sa ilang pag-oberbar sa Ramadan.

Apan natukma ning pag-oberbar sa Ramadan mao pagtumaw sa kagubot sa dakbayan sa Marawi, Lanao del Sur tungod sa pag-ataki sa Maute group sa miaging semana. Nasayod kita nga ang Marawi o Lanao del Sur naila nga 'Cradle of Islamic Civilization sa Pilipinas' human dakong mayoriya sa populasyon mga Maranaw ug Muslim.

Sa kasaysayan, ang Marawi dugay naimpluwensiya sa kasadpan. Wala masulod sa mga Espanyol ug sa ulahing bahin na sa kolonisasyon sa Estados Unidos nakuha hinungdan sa daling pagtukod sa Mindanao State University (MSU) sa pagtuldo sa mga lumad sa edukasyon sa kasadpan.

Gawas sa abante nga kultura sa mga Maranaw niadto, ang Lanao del Sur wala dayon masulod sa mga langyaw tungod sa kasuok sa dapit. Nahimotang sa tungtunga sa dakong isla sa Mindanao, diin nahimotang ang ikaduha nga labing dako nga lake sa nasod, ang Lanao Lake.

Mao kini ang hinungdan nga napreserbar ang lumad nga kultura ug tradisyon. Apan taliwala sa kanindot sa kinaiyahan ug klima sa dapit, ang dakbayan ug lalawigan kanunay gihamok sa kasamok sa sama pag-atiki sa ISIS-inpired Maute group. Nagkatibuwaag na usab ang mga lumolupyo sa pagpamakwit tungod sa kahadlok.

Ning pag-obserbar sa Ramadan, hugot natong ipangaliya ni Allah nga mahiuli na sa kalinaw sa Lanao ug buhian na ang gipangbihag nga enosenteng sibilyan, Muslim ug Kristiyano.