Mga tinun-an sa Marawi
Duha ka maestra sa Zapatera Elementary School sa dakbayan sa Sugbo natanggong sa gubat sa Marawi City. Mao ni akong report sa miaging Biyernes sa TV Patrol Central Visayas.
Una nakong nahipos kining maong kasayuran sa DepEd Cebu City Division ug gikonpirmar sa Principal sa Zapatera nga si Ma'am Lana Escario. Ang maong hitabo kabahin lamang sa kahasol nga nahiagumansa daghan natong kaigsuonan didto apil na ang mga tinun-an.
Ang giyera nahitabo samtang nagpadayon ang Brigada Eskwela ug enrolment sa mga publiko ug pribadong eskwelahan. Sigurado ko nga duna pa'y daghan ang wala pa maka pa-enrol sa dihang niulbo ang gubat. Karon nagpasilong sila sa mga evacuation center. Ug ang dakong posibilidad nga mamalhin og eskwela ang kadaghanan nila angay tutokan sa DepEd karon.
Ang DepEd sa Cebu City nipahibalo apil sila nga nangandam kung duna'y mohukom nga anhi sa ato mobalhin ug eskwela ang uban sa mga tinun-an. Way daghang langas ila kining i- enrol sanglit napatik sa guidelines sa DepEd nga ang mga bata nga biktima sa kalamidad ug giyera mahimong mobalhin ug eskwela nga di na magdala ug report card ug ubang dokumento. Sa mga tinun-an sa kolihiyo manghinaot ta nga ingon usab niini ang mahitabo. Ang atong mga kolihiyo ug unibersidad dinhi sa Sugbo motabang pagpahiluna kung dunay mga tinun-an nga mobalhin pag-eskwela dinhi.
Hinuon, human sa bagyong Yolanda napamatud-an sa taga DepEd ug Ched ang ilang pagka matinabangon. Di ba daghan kaayong mga tinun-an sa elementary, high school ug college gikan sa Samarvug Leyte ang namalhin ug eskwela dinhi.
Nahinumdom pa ko sa Inayawan Elementary School dunay daghang nibalhin. Sa tabang sa ilang principal ug magtutudlo wa gyud maglisod ang mga bata pag-adjust bisan kung di sila makasulti ug Cebuano kay Waray man ilang sinultian. Ang nakanindot kay ang ilang classmates mahigalaon sab kaayo ug nag-eskwela sila nga malipayon.
CONNECTION
Ang opisina ni Direktor Malo Manonggiring sa National Commission on Muslim Filipinos sa dalan Borromeo, Cebu City andam motunol ug tabang niadtong gustong magpakisayod kung unsa na'y nahitabo sa ilang mga paryente nga naapektuhan sa giyera sa Marawi City.
Mao ni iyang gitug-an sa akong interview. Ang ilang buhaton mao ang pagpakig-alayon sa mga ahensiya didto. Hinuon tungod sa kapaspas sa komunikasyon basin nakana ang uban. Ang wala pa mahimong modangop sa ilang opisina.