Sharing of love
Nahapak na sab kog kusog ni Cathreen sa akong bukton. Seryuso kaayo siya ug klaro sa iyang reaksyon nga nahibulong siya sa pagkatawa kog kusog.
“May kataw-anan ba sa akong gisulti, Kathy?”
Kataw-anan gyud, Cat. Mitagam dayon ka tungod sa kapakyasan mo sa una mong gugma?”
“Mabasol ba diay ko nimo kon ingon ko ani, Kathy? Kon magmahal ko, tinud-anay gyud. And forever pa gyud.”
“Wow! Martir. One woman man. C’mon, Cathreen, ayaw anang kinaiyaha, uy. Karong panahona, mouban ta sa lupad sa mga laki. Kon makapanguyab silag daghan, manguyab sab tag daghan. Kon magmahal ta, fifty percent lang ang atong ihatag nila. Ug ang laing fifty percent atong ibilin para sa atong kaugalingon aron di kaayo ta sakitan kon binuangan ta nila.”
“Di ko makahimo ana, Kath. Dihang nakig- boyfriend ko kaniadto, one hundred percent ang gihatag kong gugma ngadto niya.”
Sa tan-aw ko kang Cathreen, kahilakon na siya. Gipikpik kog hinay ang iyang abaga.
“Usba na kanang imong prinsipyo sa pagpakigtrato, Cathreen. Sun-a ko.”
“Di ko ana, uy, Kath. Mahadlok kog karma.”
“Karma? Di na mahitabo, uy, Cat, kay gi- share lang nato ang atong gugma ngadto sa mga laki. Kon usa ra ang atong higugmaon, di na kana
sharing of love? Alkanse sab ta. Parehas gud nimo, gibuwagan ka sa imong first love kay nanguyab og laing girl.”
“Ambot lang nimo, uy, Kathy. Padayon anang imong pagtuo kay mopadayon sab ko sa akoa.”
Gabii na sa among pagpamauli ni Cathreen. Nagbuwag mig sakay kay siya sa Escario man nagpuyo, ug ako sa Guadalupe. Ug sa akong paghigda sulod sa akong kuwarto, nakapanglingo ko nga naghunahuna kang Cathreen.
Poor Cathreen. Nagpagapos sa karaang sistema sa pagmahal ngadto sa lalaki.
Apan ako, kataw-an ko lang ang akong mga boyfriend kon makigrelasyon og laing babaye. Gihatagan ko silag
freedom nga mangulitawo og laing girls. Mao man sab kini ang akong gusto nila, nga hatagan sab ko nilag freedom nga makigrelasyon og laing mga lalaki.
Gikab-ot ko ang akong selpon nga gipatong ko sa ibabaw sa pasistor sa mayaulohan sa akong kama kay mitingog ang call alert ani. Si Saymon nga
akong first love, ang nagtawag. (SUMPAYAN)