7 PAMAAGI SA PAG-AMPING SA KURYENTE

Sa panahon karon, usa ning kuryente nga labing importante sa inadlaw-adlaw nato nga kinabuhi. Pipila lang gani ka oras nga

brownout, bagulbol dayon kay tumang kainit.

Gawas sa benepisyo nga ikadalit niini sa tagsa-tagsa ka panimalay, mao usab kini ang posible nga mamahimong rason sa trahedya susama sa sunog.

Ang insakto ug tarong nga paggamit sa kuryente makahatag ug magpabilin kini nga luwas gikan sa bisan unsa pa nga disgrasya.

Ania’y tips ang Visayan Electric Company (VECO) alang sa publiko sa mga angayan nga buhaton sa kuryente aron dili kini makamugna og sunog,

brownout ingon man makadaginot usab sa binuwan nga bayranan.

1. Likayi ang pagpalupad og tabanog sa mga lugar nga adunay linya sa kuryente o power lines.

Ang tugot sa tabanog mamahimong masangit sa linya sa kuryente ug posibleng maoy hinungdan sa power interruption. Delikado usab kini nga makakuryente sa nagtabanog.

2. Kon mobakasyon ang tibuok pamilya, siguradoa nga gipang- unplug ninyo ang tanan ninyong appliances ug electric equipment.

Gani, mas labing maayo kon inyong i- switch off o pawngon ang main breaker o plangka sa inyong balay.

Maayo usab kon inyong mahangyo ang inyong silingan nga pagatan-awon ang inyong balay, hilabi na kon dugay ang inyong bakasyon.

3. Ayaw pagpamplantsa gamit ang electric iron kada-adlaw.

Mas maayo kon mag schedule kamo og adlaw nga ting plantsa hilabi na kon electric

iron ang inyong gamiton. Ayaw usab basaa pag-ayo ang mga sinina nga inyong plantsahon kay mas dako og kunsomo sa kuryente ang pagpauga sa mga sinina.

4. Kanunay nga i- check ang mga kable sa inyong appliances kon wala ba nangapanit ang insulation niini.

Tabuni gilayon og electrical tape ang wires nga napanit na ang insulation.

Mas labing maayo kon mailisan gyud ang kable aron malikay sa peligro.

5. Pang-ilisi na ang inyong mga incandescent nga bombilya o suga.

Gamita ang energy saving lamps sama sa CFLs ug LED nga suga. Palunga usab ang mga suga kon wala’y naggamit niini.

6. Ayaw hikap og mga de kuryente nga mga duwaan ug appliances kon basa ka o kon nagtunob ka sa tubig.

Kay delikado nga markuyentehan ka niini.

7. Sa mga nagtrabaho sa construction, likayi ang pagpanarbaho duol sa mga linya sa kuryente.

Kinahanglan nga ang mga

construction works magmintinar og distansya nga 3 metros (pahigda) ug 4 metros (patindog) gikan sa mga linya sa kuryente. / Tinubdan: Visayan Electric Company