TALISAY 5 GIUSBAN SA MINGLA
Mga duwa karon 5:00 pm - Balamban
batok Bantayan 6:30 pm - Bogo City
batok Consolacion 8:00 pm - Mandaue City
batok Tuburan
Giusban pagpukan sa Minglanilla ang Talisay City Aqua Stars, 80-78, niadtong Sabado sa pagsugod sa quarterround sa South Division sa 2017 Cebu Governor’s Cup 21-Under Inter-Cities/ Municipalities Basketball Tournament sa Samboan Municipal Court sa lungsod sa Samboan, Cebu.
Sa pagpangulo ni Mark Justine Nebril, ang Minglanilla nakasugakod sa sikit nga kombati ug nakahigayon kini pagposte og 42-40 nga labaw sa halftime.
Human niini, ang igsuon ni Nebril nga si Marc Glen mao na sab ang ning-agak sa Minglanilla aron inaton ang ilang labaw ngadto sa 62-56 pagkahuman sa 3rd quarter.
Ning-aksyon naggukod ang Talisay City apan nakamaneho ang Minglanilla hilabi na sa krusyal nga bahin nga protektahan ang ilang bintaha hangtod na sa pagkapupos sa oras.
Gipangulohan ni Mark Justine ang kadaugan pinaagi sa iyang 21 puntos, nidugang og 17 puntos si Mark Glen samgang niamot og 15 puntos si Jiesel Tarrosa.
Kon kahinumdoman, gipukan sa Minglanilla ang Talisay sa elimination round pinaagi sa overtime nga kadaugan.
Sa laing mga duwa, giusban sab pagpilde sa Dalaguete ang host Samboan, 76-65, unya midaog sab pagbalik ang Toledo City batok sa Barili, 88-79.
Karong adlawa mobalhin ang aksyon sa Mandaue City Sports and Cultural Center diin makigparang ang host Mandaue City batok sa Tuburan alang sa pagsugod sa North Division quarter-finals.
Ang Balamban makigsangka sa Bantayan sa premirong duwa sugod sa alas 5:00 sa hapon samtang makigparang ang Bogo City sa Consolacion sa ikaduhang duwa.
Ang quarter-final round mosubay sa single round-robin diin ang top two teams mao mag-abot sa division finals best-of-three series. Ang modaog sa division finals mao ang mag-ilog sa labing unang titulo sa torneyo.