DI GUSTO OG UNDERDOGS
Wala mopabor ang online betting sa Las Vegas sa Cleveland Cavaliers ug wala kini mag-inusara.
Dili ikalimod nga mas daghan ang ningpabor sa Golden State Warriors sa pagpakigbatok niini og balik sa Cleveland Cavaliers sa National Basketball Association (NBA) Finals. Sila man tuod ang defending champion ug naa pa kanila si four-time MVP LeBron James apan batok sa Warriors, tataw’ng underdogs ang Cavaliers.
Apan alang sa Cavaliers, kataw-anan kining maong mga panahom. “The whole underdog thing
is funny to me, because yeah, at the end of the day we are defending our title,” matod ni Cavs forward Kevin Love.
“We’re trying to repeat, which is so hard to do. I think we will use it as fuel. We will use it as motivation, but the idea of playing into it? It’s tough for me to say that is the case. I don’t feel like we’re underdogs.”
Ning puntoha nga parehong nangandam ang duha ka mga kampo alang sa series nga sugdan karong Biyernes (RP time) sa korte sa Warriors, ang pamahayag ni Warriors forward Draymond Green niadtong Oktubre sa miaging nag-alirong sa palibot sa Cavaliers.
Sa Finals sa miaging tuig, ang Warriors nakaposte og 3-1 nga bintaha apan sa wala damha, nakagukod ang Cavaliers ug misagunson kini og tulo ka mga daog aron ilugon ang korona. Ang Cavaliers maoy labing unang nakahimo niini.
Human niini, si Green, kinsa nasuspenso sa Game 5 sa maong series, nanumpa nga kon ikaharong niya og balik ang Cavaliers sa finals, iyaha kining makmakon og insakto.
Imbes makiglantugi, si Love midayeg kang Green gumikan sa kinaiya niini sa pagpakigkombati.
“He’s a guy who said he wanted us and he has us — starting next Thursday,” batbat ni Love.
Kini maou ikatulong sunodsunod nga tuig nga magsangka sa finals ang duha ka mga kampo. Mingdaog ang Warriors sa premiro ug nakabawos ang Cavaliers sa ikaduha.
Ning higayuna, aduna ba kaha’y igong puwersa si James ug ang Cavaliers sa pagpakigparang sa Warriors nga nadugangan og lig-ong haligi sa paghiabot ni Kevin Durant?
Mao kini ang dakong pangutana.
Ang Warriors ningposte og kasaysayan isip labing unang team nga nakaposte og perpektong 12-0 nga rekord sa kinatibuk-ang playoffs sa Western Conference.
Dili man sab hinuon mabangbang ang Cavaliers kay kausa ra sab kini napilde sulod sa 12 ka mga duwa sa Eastern Conference.