Naghilak sa tago

Dear Papa Joe,

Pagpaninda og prutas ang among panginabuhi. Tungod wala pa mi anak, nisugot ko nga sa amoa mopuyo ang manghud sa akong bana. Sugod 1st yr high school, naa diri na sa amoa. Bugti sa iyang pag-tabangtabang sa tindahan, amo siyang gipaeskwela sa college. Pero niundang siya pagkahuman sa 1st year kay gusto na siya motrabaho.

Tuod man nagka- work dayon sya isip merchandizer sa usa ka dako nga mall. Nag-ingon siya nga maglain na siya kon ma- regular siya. Abi nako og iya tong tumanon. Ako gipangutana akong bana nganong wala pa naglain ang iyang manghud nga taudtaud na man na regular. Niingon akong bana nga huwaton lang daw namo basin nagtigom pa. Usa nalang man ka tuig pero wala man gihapon nibiya.

Ang akong problema karon, Papa Joe, kay mabdos ko unya gusto na ko makatigom og igong kantidad para sa akong pagpanganak. Gi-kwenta nako ang among matipid kon maglain na ang iyang igsuon kay P3,000. Libre man gud ni sya tanan diri sa balay. Wala ni siyay kaigog. Lain man sad kaayo kon kami-ami ray mangaon. Masuko man pud ang akong bana kon dili ko mag-andam og bugas ug sabon. Makagamit ra gyud sya sa among supplies. Pun-an pa sa suga ug kuryente.

Unsa may angay nakong buhaton. Maora man og maghuot ang akong dughan. Feeling nako way nakasabot nako. Dili pud ko ganahan nga ako mismo magpapahawa sa iyang manghud kay basin mag-away unya me sa akong bana. Kon ako pud nga i- open sa akong bana kana nga topic, dili man motingog. Maghilak na lang ko sa tago.

INDAY

Day, Wa man ka mosulti ko babaye ba o lalake ba ang manghod sa imong bana. Basin babaye, naglantaw siguro sa safety ang imong bana mao nga ingon ana siya. Ingna ang imong bana about sa imong concern kay siya may padre de pamilya. Basin kaya niya. Kon moingon siya nga dili, mangayo mo og share sa iyang igsuon.

Mahilot ra nang tanan kay ang pagtabang magbunga sad na og grasya pero ang kasuko way ayo nga ihatag kanato. Pray lang nga malamdagan sad ang imong bana.

PAPA JOE