‘SAKOP’ NI JAGUAR NASIKOP
MITAHAN SA ‘TOKHANG’, MIBALIK SA ILLEGAL DRUGS
Gaway ni anhing Jeffrey Diaz, alyas Jaguar, nga nitahan sa Oplan Tokhang, nadakpan sa gihimong buy bust sa Mambaling police station sa dakbayan sa Sugbo.
Ang nasikop mao si Arnulfo Bermejo Abellana, alyas Hapon, 52, taga sitio Chicago, Barangay Duljo Fatima, siyudad sa Sugbo.
Siya nakuhaan og mga pinakete sa illegal nga drugas atol sa buy bust operation.
Matod ni Sr. Insp. Eduardo Sanchez hepe sa Mambaling police station nga duha ka semana nilang gipanid-an si Abellana human nitahan apan nibalik sa iyang illegal nga negosyo.
Sa milabay nga hapon, ang iyang live in partner nidangop sa police station human niya bun-oga.
Tungod niini, gilusad dayon nila ang operasyon nga miresulta sa iyang pagkasikop.
Dugang ni Sanchez nga human mapatay si Jaguar sa mga pulis sa Las Piñas niadtong miaging tuig, nihunong usab si Abellana sa illegal nga negosyo.
Nagpatabang ni kang Barangay Kapitan Elmer Abella nga mo-surrender sa Oplan Tokhang ug gi-monitor.
Ilang nahibaw-an nga nibalik kini sa iyang negosyo.
“Pagkamatay ni Jaguar, ni lie low ni siya ug nagpatabang sa ilang kapitan nga mo surrender. Mao to, amo siyang gi monitor pero nibalik gyud siya,” dugang ni Sanchez.
Motimbang ngadto sa 40 gramos nga gituohang shabu ang nakuha kang Abellana nga gibana-bana nga mobalor og P185,000.
Sa ilang gihimong monitoring, makabaligya og 200 gramos matag semana si Abellana nga maoy hinungdan nga nalakip kini sa high value target.
Giangkon ni Abellana nga iya ang illegal nga drugas nga nakuha sa iyang posisyon ug matod niya nga bag-o lang siya nibalik sanglit wa siyay nahibaw-an nga trabaho apan hugot niyang gihimakak nga tawo siya kaniadto ni Jaguar.
“Silingan ra mi ni Jaguar ug kaila pud mi sa prisohan ana niya pero dili ko niya tawo oy. Dugay na ko aning negosyoha pero on and off ba,” matod ni Abellana.
Duna pay laing mga gaway ni Jaguar nga naa sa Duljo Fatima nga gipanid-an sa pagkakaron.
Samtang sa dakbayan sa Talisay, usa ka lalake nadakpan sa pagpamaligya og ginadiling drogas sa Barangay San Roque, Talisay City niadtong Miyerkules sa gabii.
Si Allen Gador, 30, nadakpan human makadawat ang kapolisan og tawag sa usa ka concerned citizen.
Sa pagsusi sa kapulisan, nakuhaan siya og 11 ka paketeng shabu nga adunay 0.33 ka gramos nga mokantidad og P3,894.
Naimbarguhan siya og video karrera machine ug upat ka mga moli-moli machine sulod sa iyang barungbarong.