DRUGS NAKUHA SA JAIL SA MENOR
Susama og pangandam sa usa ka riot, maoy paghulagway ni Cebu City Councilor Dave Tumulak dihang iyang gipresentar ang mga kontrabando nga nakuha sulod sa pasilidad sa Operation Second Chance atol sa gipahigayon nga Greyhound operation niadtong hapon sa Mayo 31.
Sukad niadtong Abril, ang Cebu City Government na ang nagpadagan sa maong pasilidad.
Subay sa lakang nga malimpyo kini, usa ka operasyon ang gihimo alas 2:00 sa hapon niadtong nakalabay nga adlaw.
Matod ni Tumulak nga inabagan sa Cebu City Disaster Team ug kapulisan sa Guadalupe Police Station ang maong operasyon.
Lakip sa nasakmit nila ang usa ka pakete sa shabu, paraphernalia, putos sa marijuana ug mga nagkadaiyang makamatay nga hinagiban.
Si Tumulak, deputy mayor for police matters, nagkanayon nga usa sa ilang gibuhat mao ang pagpahigayon og saturation driver sa domitory sa minor offenders ug nakakuha sila og mga kontrabando sama sa improvised weapons, puthaw, kahoy, pisi, ug gadgets.
Gumikan sa maong operasyon, si Tumulak niingon nga gipaubos karon sa imbestigasyon ang tanang personnel lakip ang houseparents sa Operation Second Chance nganong nakasulod ang maong mga kontrabando nga wa nila mamatikdi.
Aron nga di na usab masubli pa ang maong panghitabo ug masiguro ang kaluwasan sa mga menor nga naa sa maong center, regular nga mopahigayon og saturation drive ang siyudad hinuon random lang kini.
Sigon ni Tumulak nga nasuta nila nga adunay hugpong sa mga minor offender sa Operation Second Chance ug nagtuo ang konsehal nga ang mga nakuhang improvised weapons gamiton kini sa mga menor.
Gihulagway usab sa konsehal nga alarming ang maong hitabo hilabi na nga pulos menor ang naa sa pasilidad apan kahibawo na matod pa mohimo og mga hinagiban nga delikado.
Si Tumulak miingon nga base sa ilang imbestigasyon nga himuon, kon mapamatud-an nga aduna’y personnel o houseparent nga nalambigit niini, mawagtangan gyud og trabaho.