Tabunok flyover ayuhon na sab; trapiko mograbe

Kalbaryo sa trapiko sa mga lumolupyo sa habagatang Sugbo gipaabot nga mosamot.

Gawas sa pagsugod og trabaho sa underpass sa Brgy. Mambaling, dakbayan sa Sugbo, padayunon usab tunga-tunga karong buwana ang pag-ayo sa flyover sa Brgy. Tabunok, Talisay City.

Gibutyag sa pangulo sa Department of Public Works and Highways Cebu 2nd District, Lesly Anthony Molina, nga sa tunga-tungang bahin karong buwana sugdan na ang pagayo sa Tabunok flyover.

Mao usab kining panahona nga maabot ang ilang gikinahanglang mga materyales.

Ang ilang gi-order nga mga expansion joints gikan sa Korea paingon na dinhi sa nasud.

Gumikan niini, si Molina nanawagan sa mga motorista sa pagsunod sa lagda sa trapiko nga gipatuman sa City of Talisay Traffic Operations Development Authority (CT-TODA) aron di mosamot ang kahuot sa trapiko sa lugar sa higayon nga ayuhon.

Si Molina niingon nga grabe unya ang kahuot sa trapiko sa lugar kay nadungan usab kini sa pagsugod sa underpass sa Natalio Bacalso avenue sa dakbayan sa Sugbo.

Samtang sama sa gihapon, ang South Road Properties (SRP) ang ilang gitumbok nga alternative route sa pagkakaron.

Duha ka mga pamaagi ang sagupon sa DPWH-7 sa higayon nga kini ayuhon.

Una ang pagsira sa Tabunok flyover 24 oras ug mahuman sulod lang sa 15 ka adlaw.

O ba kaha paagian ang usa ka lane apan mahuman kini sulod na sa 30 ka adlaw.

Sa pagkakaron, padayon silang nakig-alayon sa CT-TODA alang sa pagplano sa agianan aron di kaayo mohuot ang trapiko sa higayong masugdan na ang pag-ayo.

Ang proyekto mogasto og dul-an sa P20 milyones ubos sa PLD construction. /