Misuporta ko sa Martial Law
Taga Mindanao ako. Didto ako nakakita sa ubang bidlisiw sa haring adlaw. Didto nabati ang akong unang hilak ug didto gilubong ang akong pusod sa akong yutang natawhan sa barangay Olingan, Dipolog City. Didto ako magtungha sa akong elementarya ug sekondarya sa Dipolog. Sa kolehiyo, didto ako magtungha sa dakbayan sa Zamboanga diin didto usab nako nakat-onan ang akong propisyon.
Nasayod ako sa mga taras ug kina-iya sa mga tawo sa Mindanao labi pa sa atong kaigso-onang Muslim. Kanang pagbitbit og armas ordinaryo ra kana didto. Kanang atong makita ang presensiya sa militar bisan sa kinapusuran sa dakbayan, ordinaryo ra gihapon. Dili mahadlok o malisang ang mga tawo kon makakita og mga tangke de guerra nga nagsaoy-saoy sa bisan asang lugar. Mas malipay ang mga tawo kon makakita og mga sundalo gumikan kay alang kanila luwas sila. I am a Mindanaoan and I support Martial Law.
Daghan ang nangutana kanako sa akong baruganan kabahin sa deklarasyon sa Martial Law sa tibuok Mindanao. Nagkasumpaki o inconsistent kuno ang akong baruganan. Kay samtang mi-uyon ug misuporta ako sa pagpa-ubos sa Martial Law sa Mindanao, supak ako kon iapil ang Visayas o Luzon.
Tinuod kana nga misuporta ako sa deklarasyon sa Martial Law sa Mindanao sa simple kaayo nga rason. Kay kini gikinahanglan gumikan sa pag-atake sa teroristang Maute Group sa dakbayan sa Marawi. Lisod kon miter-mitaran sa kagamhanan ang pagpuhag sa maong grupo. Daghan ang nangamatay ug napurwesyo gumikan kay namakwit ug nanglayas ang mga lumolupyo didto sa Marawi City.
Pero nganong supak man ako sa pag-apil sa Visayas ubos sa Martial Law? Gumikan kay wa may gubot dinhi sa ato. Kon atong subayon ang mga rekisitos sa deklarasyon sa Martial Law base sa atong Batakang Balaod, gikinahanglan nga adunay kagubot, pagsulong o pag-atake sa puwersa sa gawas sa nasud og rebelyon. Ania ba kining maong mga elemento? Wala. Busa walay igong basihanan ug sukaranan nga i-deklarar ang Martial Law sa ubang bahin sa nasud.