Magsakripisyo
Pipila ka mga tuig nang nahisgutan ang pagbutang og underpass sa bahin sa N. Bacalso Avenue sa Brgy. Mambaling, Cebu City aron pagsulbad sa trapiko ug tipik sa suliran sa baha. Ning administrasyon ni Presidente Rodrigo Duterte, ang katukoran sa underpass, nga mahimong ikaduha sa dakbayan sa Sugbo, mahinayon na human kini gigahinan sa kagamhanan.
Apan bisan unsa pa nga trabaho sa karsada, duna kini epekto sa dagan sa trapiko. Ang ehemplo niini mao ang sa Siyudad sa Mandaue.
Dihang gipang-ayo ug gipalapdan pa ang mga karsada niini sa Department of Public Works and Highways (DPWH), nangreklamo ang publiko sa kahimtang sa trapiko.
Nagbaha ang negatibong mga posting sa social media kabahin sa suliran sa trapiko tungod kay nagdungandungan ang pagayo sa mga dan.
Kon nahitabo kadto sa Mandaue City, mao gihapon kini ang mahitabo kon sugdan na ang paghimo sa underpass.
Huot man gani ang trapiko sa N. Bacalso karon nga wa pa ang proyekto, unsa na kaha kon sirhan na ang usa ka bahin niini? Di paigo ang diversion nga mga agianan nga kadaghanan gagmay ug huot nang daan.
Bisan si DPWH Regional Director Ador Canlas niangkon nga moapekto kini sa trapiko busa, gikinahanglan nga magsakripisyo.
Maghuot man sa trapiko, mas maayong mosayo sa paglakaw aron di madelatar sa trabahoan, eskwelahan o appointment. Di basulon ang kagamhanan kay ang epekto mahimo mang mapanagan-an aron di dako ang purhesyo.
Total, kon mahuman ang proyekto, gilauman nga makapaluag kini sa dagan sa trapiko. Apan mas maayo usab unta, kon ang kontraktor mopaspas sa iyang trabaho aron di motaas ang pagsakripisyo sa publiko.