Debate sa martial law sa Mindanao
Kining pagdeklarar ni President Duterte og Martial Law sa tibuok Mindanao sud sa 60 ka adlaw gikuwestiyon sa oposisyon ug sa mga walhon. Ang mga sakop sa super
majority sa Ubos Balay-Balauranan kusganong miindurso sa Matial Law ingon man ang
majority bloc sa Senado. Sa 22 ka nahabiling senador, 17 ang miindorso sa resolusyon nga nagpaluyo sa balaud militar samtang lima ang misupak sa martial law sa Mindanao.
Ang resolusyon sa minority nga magpatawag unta og hiniusang session aron tukion ang maong isyu gibasura sa mayoriya sa boto nga 129. Tungod niini, nagplano ang oposisyon nga modangop sa Korte Suprema aron sutaon ang basihanan sa pagdeklarar sa martial law. Gikinahanglan pa ba gud ni?
Sigun sa Batakang Balaud nga kinahanglang maghimo og joint session ang mga kongresista ug mga senador aron diskutihon ug botuhan kon kinahanglang ipadayon ang martial law o dili. Unya klaro naman nga ang bagang mayoriya sa mga kongresista ug senador misuporta man sa
martial law, unsa pa may gamit sa joint session? Kining debate sa Martial Law nahimo nang partisan political activity. Klaro sa Sec. 18, Art. VII sa 1987 Constitution nga nagkanayon: Ang basihan sa pardeklarar og martial law mao ang invasion or rebellion or when public safety requires it. Kining tanan nahitabo sa Mindanao, unya nganong supakon man kini sa mga anti-Duterte? Tungod lang sa ilang pamulitika bisan og nakauyon niini mismo ang taga-Mindanao?
Dili na makapanabako sunod buwan
Niadtong May 16, si Presidente Duterte mipirma sa Executive Order No. 26 nga nagdili sa pagpanabako sa mga publikong dapit sa nasud.
Ang implementing rules and regulations (IRR) kalabut niini gipaabut nga maguwa karong sunod buwan ug tingalig maapil sa State of the Nation Address (SONA) sa presidente.
Sumala sa maong EO nga gidili ang pagpanabako sa mga tunghaan, trabahoan, government facilities, playgrounds, sports centers, church grounds, hospitals, transportation terminals, markets, sidewalks, parks, resorts, elevators ug uban pa, sa mga dapit nga fire hazard, mga sakyanan ug uban pa.
Daghang mga local government units (LGUs) nga adunay mga ordinansa kalabut sa smoking ban apan wala kini matuman. Mapatuman kaha kining EO No. 26?
Bright ang mga Bisdak
Sunod-sunod ang pagpanghawod sa mga tinun-an sa University of San Carlos (USC), Cebu City sa nagkalainlaing government exams.
Una niini ang bar examination diin taga-San Carlos ang No. 1 ug unom sa Top Ten gikan gihapon sa maong unibersidad. Laing mga graduates sa USC nga manag-agaw ang nagsawo sa No. 1 sa CPA board exam. Sa bag-o lang usab nga gi- release nga result sa Chemical Engineering board exam taga-USC gihapon ang No. 1. Gawas sa USC misulod usab sa Top 10 ang University of San Jose- Recoletos (USJ-R) ug ang Cebu Institute of Technology- University (CIT-U). Congrats mga Bisdak!