Kahuot sa trapiko
Ipatuman sa Department of Public Works and Highways (DPWH) 7 ning buwana ang P700 milyunes nga underpass project sa N. Bacalso Avenue ug F. Llamas st. sa syudad sa Sugbo.
Si DPWH 7 Director Ador canlas namahayag nga kon matapos ang maong proyekto, makapaluag kini sa trapiko sa maong dapit tungod kay kasagaran sa mga motorista padung ug gikan sa habagatang Sugbo moagi sa N. Bacalso avenue. Mao kini ang ikaduhang
underpass project dinhi sa syudad. Ang una mao ang
underpass ilawom sa Plaza Independencia padung sa Cebu South Coastal Road.
Apan samtang ipatuman ang underpass sa N. Bacalso Avenue, makapaabot ang katawhan, ilabi na ang mga motorista ug mga sumasakay, nga mohuot ang trapiko sa maong dapit.
Mao kana nga pagahimuon ang usa ka traffic dry run karong Hunyo 7 ug 8 aron pagsuta sa epekto sa rerouting sa maong dapit sa dagan sa trapiko kay sirad-an man ang eskina sa N. Bacalso Ave. ug F. Llamas St.
Ipatuman ang maong proyekto sa sud sa 18 ka buwan. Mag-antos una sa kahuot sa trapiko, kay kon mahuman molugak na man.
Si Director Canlas niingon nga kon way kakulian sa
traffic dry run, sugdan dayon sa contractor ang maong proyekto. Apan hinumdumi nga ipatuman kini atol sa pagbukas pagbalik sa klase sa buwan sa Hunyo.
Naghuot na man gani ang trapiko sa wa pay klase, unsa pa kaha kon magklase na? Matod pa ni Canlas, ang maong proyekto niadto pa untang Abril sugdan, apan nalangan tungod sa daghang mga kakulian, lakip na sa bag- ong balaod sa pagpalit sa lote ug mga building nga maapektohan sa proyekto.
Ang maong proyekto adunay unom ka lanes, ang duha ka lane nga underpass ug ang duha ka service road, busa daghang mga
commercial building ang maapektohan.
Giawhag ni Director Can las ang suporta sa katawhan sa maong proyekto. Matod pa niya, “We need all the support that we can get because at the end of the day, we will all benefit from the project.”
Morag wa may nisupak sa maong proyekto. Tingali way kahoy nga maapektohan. Di sama sa Bus Rapid Transit (BRT) nga makaapekto sa kapin sa 2,000 ka mga kahoy sa rota niini.