Sharing of love
Ambot ba sab sa akong kaugalingon, uy! Makalagot gyud. Kanunay na man nuon kong naghunahuna kang Saymon. Unsa ba kining akong gibati niya? Mao ba ni ang gitawag nga true love? No! Misupak ang akong hunahuna. Di ko angay mahigugma sa tinud-anay. Angay ko lang duwa-duwaan ug pasakitan ang mga lalaki.
Apan ang pinitik sa akong kasingkasing di ko mahimong limdan.
Kay sa pagpanglabay sa mga adlaw, nagkadako ang gibati kong kamingaw kang Saymon. Di na siya motawag nako sa selpon. Di na gani mopadalag mga love messages nga kanunay niyang buhaton nako kaniadto.
Gipaubos ko ang akong garbo. Gitawgan ko si Saymon sa selpon. Kahilakon ko sa kalipay dihang nag-estorya na mi. Morag natambalan ang gibati kong kamingaw niya. “Magkita ta ron, Mon.” “Sige. Asa man?” Sa McDonald’s sa Fuente mi nagkita si Saymon. Seryuso kaayo siya. Morag gusto kong gakson si Saymon. Apan nagpugong lang ko sa akong kaugalingon. Miinom ko sa akong juice.
Nganong wa ka na may tawag-tawag nako, Mon? Di ka na man lang gani moteks nako.” Miginhawa kog lawom kay morag mihuot ang akong dughan.
Karon sa among panag-atubang ni Saymon, di ko na gyud ikatago sa akong kaugalingon nga true love ang gibati ko niya.
“Duwa-duwa man lang nang imo nako, Kathy. Wa ka may love nako.”
Sa tan-aw ko kang Saymon, nahiubos gyud siya nako.
“Angkunon ko na nga tinuod na, Mon. Pero kaniadto ra na. Karon, di ko mauwaw mosulti nimo nga tinud-anay na ang akong pagmahal nimo. Yes, Saymon. I really love you now.”
Wa na makatubag si Saymon kay dunay babaye nga miduol nako. Si Cathreen nga malipayon nga nagtan-aw nako. Nagtalikod si Saymon kang Cathreen.
“Daan pa gyud ko nga ikaw ang akong nakita sa gawas, Kathy. Misulod na lang ko kay gigutom sab ko.” Gipahiyoman ko si Cathreen. “Maayo sab nuon, Cath, aron magkaila mo sa akong
first love. Si Saymon.” Misiga ang mga mata ni Cathreen dihang nagkatinanna sila si Saymon. Nahibulong ko kay naghilak si Cathreen.
“Ikaw diay ang babaye nga giingon ni Saymon nga iyang love maong nakigbuwag siya nako?”
Nakugang ko. (TAPUSON SUNOD GULA)