KOMBATI NA!
Mohunong sa makadiyot og tuyok ang kalibutan sa basketball karong buntag aron ipunting ang mga mata ngadto sa unang pagtak-ang sa panag-engkuwentro sa defending
champion Cleveland Cavaliers ug runners-up Golden State Warriors - sa bestofNBA finals.
Dunay mipabor nga ang Cavaliers molampos paglabni sa ilang unang back-to-back
championships ning maong series apan daw nagpasuabi ang mga midapig ug nanglantaw sa kadaugan sa Warriors kansang kalig-on sa puwersa nadugangan sa presensiya sa inilang si Kevin Durant.
Wa pa man tuoy titulo nga ilogan sa Game One karong buntag, apan ang bintaha sa dagan sa serya maoy anaa karon sa alimpatakan sa matag habig. Sa kasaysayan sa NBA finals, mayoriya sa midaog sa Game One maoy nakaangkon sa kampyonato.
Napukan sa niaging tuig sa makasaysayon nga pagbangon og balik sa Cleveland bisan pa man sa 3-1 nga bintaha sa serya, ang Warriors nagpanikad nga makabawos ning higayona. Una usab kining higayon nga ang duha ka teams sunodsunod nga katulo mag-abot sa finals. Isip no. 1 sa overall standing sa regular season, ang Warri- ors maoy mo- host sa unang duha ka duwa diha sa Oracle Center, diin nalangkat sa Cavaliers ang ilang unang kampyonato sa NBA. Gilauman nga makahatag og saktong kombati ang matag panig gumikan kay pulos anaa sa kahimsog ang duha ka team, sukwahi sa niaging tuig nga adunay gipamati si Stephen Curry sa iyang tuhod nga maoy gitumbok nga rason sa kapugdol sa iyang opensa. Ang Warriors 12-0 sa playoffs ug mihagdaw kini’g 27 ka daog sa uwahing 28 ka mga duwa. Kini maoy unang misyon sa Cleveland kon unsaon pagpakgang ang team kansang mga kontra gipanglubong og tag 16.3 puntos matag duwa.
Ang panaghugpong sa mga inilang outside shooters nga sila ni Durant, Curry ug Klay Thompson nga giubanan nila ni Draymond Green ug Andre Iguodala maoy butang nga nakapahimong super team sa Warriors. Halawom usab ang ilang bench nga gilangkuban nila ni Shaun Livingston, David West, JaVale McGee ug Zaza Pachulia.
Sangkap sa puwersa man tuod ang Warriors, apan ang Cavs 12-1 sa playoffs, gilantaw usab nga makahatag og igong katakos ni bisan kinsa ang ilang ikaatbang. Gani gitutokan karon sa Warriors kon unsaon pagdepensa ang no.1 player karon sa NBA nga si LeBron James kinsa mibuak og mga record sa NBA lakip na ang mga makasaysayong butang nga nahimo sa legendary nga si Michael Jordan. Si James maoy unang player nga nangulo sa NBA Finals sa mga major statistics nga may 29.7 puntos, 11.3 ka rebounds, 8.9 assists, 2.6 steals ug 2.3 blocks matag duwa sa niaging tuig. Sa karon nga season ug sa edad nga 32-anyos, siya nag- average og 26.4 puntos, 8.6 rebounds ug 8.7 ka assists sulod sa 37.7 minutos sa korte. Gawas sa outside shooting ug mga lusot atubangan sa hugot nga mga guwardiya, ang iyang kahanas sa pagpasa ngadto sa laing mga sinaligan nga sila si Kevin Love, Kyrie Irving, JR Smith ug Tristan Thompson maoy maghatag og labad sa ulo sa Warriors. Di usab masalikway ang presensiya ni Kyle Korver nga makatimang usab nila ni Channing Frye ug James Jones sa ubang mga shooters sa Cavaliers.
You can’t stop LeBron. He’s going to score. He’s going to get other players involved in the scoring by passing the ball off. So you’ve got to make him work as hard as he can. He can’t have an easy game. - Mike Brown, Golden State asst. coach sa Warriors