1.6 M BATA MODAGSA

SA MGA TUNGHAAN SA CENTRAL VISAYAS, SEGURIDAD GIHIGPITAN.

Kapin sa 1.6 milyunes ang gibanabanang gidaghanon sa mga tinun-an nga motungha sa mga publiko ug pribadong tunghaan sa Central Visayas (CV) sa school year 2017-2018 nga mag-abli karong adlawa.

Kini nga ihap gibase sa talaan sa mga estudyante sa miaging 2016-2017 school year, sumala ni Department of Education 7 information officer Amaryllis Rodriguez.

Si Department of Education 7 regional director Juliet Jeruta nibutyag nga madugangan pa ang ihap sanglit wa pa makaduso og talaan sa ilang buhatan ang mga pribadong tunghaan nga nagtanyag og senior high school.

Matod niya nga nabatasan na usab sa ubang mga ginikanan nga diha na mopaenroll o mopatungha sa ilang mga anak sa dayong hinapos na sa Hunyo.

“So, sana makuha natin 'yang habit na ' yan...” pamulong ni Jeruta.

Mapun-an ang gidaghanon gumikan sa mga estudyante nga nibakwit ug dinhi na motungha sa Sugbo gumikan sa kagubot sa Marawi diin nagpadayon ang operasyon sa militar batok sa Maute Group.

Si Rodriguez nidugang nga makapagawas sila og opisyal nga talaan sa gidaghanon sa mga estudyante sa unang semana sa Hulyo diin mahuman na ang enrollment sa mga tunghaan sa tungungang Kabisay-an.

Nalantawan usab nga dunay mga tinun-an ang mobalhin sa mga publikong tunghaan gumikan sa pagsaka sa bayranan sa mga pribadong eskwelahan. Sa survey sa senior high school, matod ni Jeruta, nilapas sila sa ilang projection nga 84 porsiyento diin niabot og 97 porsiyento ang mga tinun-an nga mopadayon sa Grade 11 gikan sa Grade 10.

Si Jeruta nalipay nga nakita sa mga ginikanan ang kamahinungdanon sa pagpatungha sa ilang mga anak.

“So, let's rejoice! When it comes to formal schooling, there is really an increase of awareness on the importance of education,” pahayag ni Jeruta atol sa Regional Convergence Meeting ug Media Forum niadtong Biyernes. Ang tuig tingklase 2017-2018 maoy hingpit nga pagpatuman sa K + 12 Program. /