Taxi operators naglisod na sa pagkuha og mga drayber tungod sa pag-uso sa TNVS?

Apektado karon ang mga operator sa taxi sa Sugbo subay niining nagkadaghang driver nga wala na mo-drive og taxi apan nanguha og kaugalingon niini nga sakyanan aron mag-GrabCar ug Uber.

Ang Land Transportation Franchising and Regulatory Board (LTFRB) 7 nipahibaw nga niadtong Septiyembre 8 pa sa nakalabay nga tuig nahupas ang aplikasyon sa Transport Network Vehicle Services (TNVS).

Apan aduna'y mga nakaapply og 45-adlaw nga Provisional Authorities (PAs) hinungdan nga aduna'y uban nga nakadagan pa hangtod karon.

Matod ni Richard Cabucos ang presidente sa Metro Cebu Taxi Operators Association ( MCTOA) nga apektado karon ang mga operator tungod sa pagbalhin sa mga driver sa taxi ngadto sa mao nga car service.

Aduna'y 3,000-4,000 ka mga taxi unit ang 2,000 ka mga operator nga miyembro sa MCTOA nga karon nakasinati niini.

Mismo si Cabucos kinsa aduna'y 140 ka unit apektado niini.

Gibutyag niini sa Superbalita Cebu nga 60% sa iyang unit gadagan samtang ang nahabilin nga 40% wala'y driver.

Sa matag unit, depende sa model ug year niini P1,000 ang abang sa matag driver sulod sa 24 oras wala pa'y labot ang gasolina niini.

Gidasig hinuon sa MCTOA ang mga ahensiya sa gobyerno hilabi na ang Land Transportation Office (LTO) nga mao unta ang manakop nga dakpon ang kolurom nga GrabCar ug Uber.