Tabunok flyover ayuhon og balik

Uyon si Mayor Eduardo Gullas pabor nga ayuhon ang Tabunok flyover sud sa 15 ka adlaw inay 30 ka adlaw ang pagtrabaho.

Apan si Gullas nanawagan sa kontraktor nga trabahuon kini 24 oras ug kinahanglan nga daghan ang mga kawani.

Una niini ang hepe sa Department of Public Works and Highways Cebu 2nd District Lesly Anthony Molina mipahibaw nga sa tunga-tungang bahin karong buwana sugdan na ang pag-ayo sa Tabunok flyover tungod kay mao usab kining panahona nga maabot ang ilang gikinahanglang mga materyales.

Matod ni Molina nga grabe unya ang kahuot sa trapiko sa lugar ilabi kay nadungan usab kini nga sugdan ang underpass sa Natalio Bacalso Avenue habig sa dakbayan sa Sugbo.

Samtang, duha karon ka mga pamaagi ang sagupon sa DPWH 7 sa higayon nga kini ayuhon.

Una ang pagsira sa Tabunok flyover sud sa 24 oras ug mahuman kini sud lang sa 15 ka adlaw o ba kaha paagian ang usa ka lane apan mahuman kini sud na sa 30 ka adlaw.

Si Gullas miingon nga ila kining gituki atol sa pagbisita ni Molina ngadto sa iyang buhatan.

Matod niya nga uyon siya sa 15 ka adlaw nga pagtrabaho kay sa moabot pag usa ka buwan nga kuyaw pang molapas.

Gipasabot ni Gulllas nga maayo nalang nga hingpit nga sirad-an ang flyover aron paspas ang trabaho ug di na mabalda sa mga sakyanan.

Gani gusto sa mayor nga kon mahimo di paabton og 15 ka adlaw kon trabahuon 24 oras pinaagi sa pagdaghan usab sa mga motrabaho.

Iyang giklaro nga mas dali mas maayo tungod kay sila man mismo sa Talisay ug ang mga tawo nga moagi maoy grabe unyang maapektuhan ilabi na kay magsugod na usab ang klase.

Samtang labot paghawan unya sa mga manindahay ug mga motorsiklo ingon man hablhabal nga anaa sa ilawom sa flyover.

Si Gullas miingon nga ang kagamhanan sa Talisay motabang sa paghawan aron ang mga sakyanan nga moagi sa ubos nga bahin sa karsada di mosamot kahuot.

Nasayran nga sama sa gihapon ang South Road Properties mao karon ang gitumbok nga laing agianan paingon sa south ug ang mopaingon sa dakbayan sa Sugbo.

Gipaabot nga mosamot unya ang kahuot sa trapiko tungod kay posibling magdungan usab ang pagtrabaho sa underpass sa N. Bacalco Ave. dakbayan sa Sugbo.

Ang proyekto mogasto og dul-an P20 milyones ubos sa PLD construction.

Una nang gisirad-an ang flyover aron pag-ayum-ayom sa mga libaong.