Mga hotel gigamit nga mga drug den?

Sagad sa atong madunggan nga ang gipanghimo nga drug dens, lugar diin adto magtampunsisok ang tiggamitan og ilegal nga drugas, kadtong mga abandonadong mga balay nga layo sa katawhan kay dali dang makita kon dunay mga pulis ug ubang pang mga tinugyanan sa balaod nga moronda.

Ang ubang drug dens nahimuta sa mga sum-ok nga lugar taliwa sa nagsumpot-sumpot o nagsikitsikit nga kabalayan, busa di dayon mabantayan ang pagsuyop sa ilegal nga drugas.

Usa sa mga rikisito aron madeklarar ang usa ka lugar nga drug-free mao nga way drug den sa maong dpait. Mao nga gihingusgan karon sa mga tinugyanan sa balaod ang pagronda sa giingon nga drug dens.

Apan ang mga tiggamitan og drugas nag-anam sab sa igmat ug nag-amping nga di sila masikop. Mao nga nibalhin sila sa ilang mga drug den ngadto sa lugar nga di magtuo ang kapulisan ug ubang mga tinugyanan sa balaod nga gihimo na diay nga usa ka drug den.

Ang labi nila ulahing nahuna-hunaan mao ang paghimo sa mga hotel dinhi sa syudad sa Sugbo nga drug den. Adto na sila mogamit sa ilegal nga drugas sa pagtuo nga layo ra ang kahigayonan nga masikop sila.

Gikan sa mga hilit nga dapit, nibalhin ang mga tiggamitan og ilegal nga drugas ngadto sa mas luhong dapit. O, di ba kaha nga dugay nang gigamit ang hotels nga drug dens apan karon lang madiskubrehi.

Niadtong Huwebes sa gabii, Hunyo 1, ang mga operatiba sa Philippine Drug Enforcement Agency (PDEA) 7 nakasikop og 15 ka mga suspetsado sa illegal nga drugas sa managlahi nga pagronda sa duha mga hotel sa siyudad sa Sugbo. Nakasakmit sila og 135.18 ka gramo nga shabu nga mobalor og P460,800.

Si PDEA agent Earl Rallos niingon nga pipila ka mga kuwarto sa maong mga hotel gigamit isip mga drug dens. Ilang pang gisusi kon unsay tulubagon sa tagdumala sa mga hotel kansang mga kuwarto gigamit sa drug dens.

Wa pa gyud diay masumpo ang paggamit sa ilegal nga drugas. Ang mga tiggamitan og ilegal nga drugas apan nilikay sa hilit nga dapit ug nibalhin ngadto sa mga hotel.