Maayong pag-eskwela

Kumusta ang inyong unang sa klase? Wala bay problemang nasugatan? Ang kapulisan dunay espisyal nga operasyon ning adlawa alang sa seguridad sa mga eskuwelahan labi na sa mga bata nga motabok sa kadalanan. Bahin sa kakuwang sa lawak-saringan? Dili na kita matingala niini human matag tuig kini nanagtumaw bisan sa giingong grabeng pagpangandam sa kagamhanan pinaagi sa Department of Education (DepEd).

Sa Rehiyon 7, gibanabana nga 1.6 milyunes ka mga tinunan sa kindegarten, elementarya ug high school ( junior ug senior) ang mohugpa sa mga tunghaang publiko ug pribado karong adlawa. Seguradong tigaw apan lingaw labi na sa mga bata nga unang nitunghan nga kadaghanan dili pabiya sa mga ginikanan o naghatod niini. Natural kini nga reaksiyon sa enosenteng bata. Paanad lang.

Ang kalihim sa DepEd, Leonor Magtolis Briones, daan nang nipasidaan batok pagpangolekta og amotan sa mga tunghaan o magtutudlo. Libre ang edukasyon sa nasod huma gihatagn kini og igong pahat sa pundo gikan sa nasudnong panudlanan. Niawhag si Briones sa pagtaho sa ilang buhatan bahin sa namatikda nga kalapasan sa iyang mando.

Hinaut nga mga magtutudlo nga makasugod na sa ilang klase human naandam na ang mga tunghaan sa miaging kampanya sa Brigada Eskwela. Apan kon mokaon gihapon og taas nga oras ang pagpanglimpiyo sa lawak sa mga tinunan karon, dako kining kuwestiyon sa magtutudlo. Angay nga isumbong kini sa iyang labaw sa DepEd.

Usa sa sagubangon sa mga tinun-an ug mga magtutudlo karon mao trapiko sa sayong buntag. Usa kini sa dakong problema sa dakbayan nga nakaapekto sa tanan busa, magdala na lang kita og mas taas nga pasensiya inig biya nato sa balay aron kalma lang gihapon ang atong buot sa pag-abot sa tunghaan karon. Maayong pag-eskwela.