Balik eskwela, balik karsada
Nagkita mi sa iyang grahianan ang jeepney driver nga si Romeo Tejedor. Sa daklit namong panag estorya nireklamo siya sa nsgka grabe nga kshimtang sa trapiko sa iyang. Pardo-Colon ang iyang gisubay matag adlaw nga tanan. Ang sipra sa iyang gidrayban 10-G. Sa ato pa gikan sa Pardo mosubay siya sa Natalio Bacalso Ave. diretso sa ilawom sa Mambaling flyover dayon liko padung sa dalan C. Padilla deretso sa dalan Colon. Unya’g balik mao ra gihapong rutaha ang iyang subayon. Di bag-o ang iyang reklamo.
Mosamot pa gyud ni karong adlawa kay magsugid na ang klase sa 68 ka publikong eskwelahan sa elementarya ug 54 sa high school sa dakbayan sa Sugbo. Di pa ni mao kay sa pagka petsa 13 ang dul-an sab sa usa ka gatos ka pribadong eskwelahan nga maglakip sa kolihiyo ang mobalik sa pagklase.
Kung nagreklamo si Romeo sa panahon nga wa pay klase sigurado ko nga magkulismaot ang iyang nawong sugod karong adlawa. Mosamot pa gyud ni unya’g sugod sa trabaho sa underpass nga nahimutang sa iyang ruta. Matod niya iyaha na nga napanglantawan nga maapektuhan ang iyang kinitaan pag-abot ning panahona. Siya ug ang liboan nga driver sa jeepney ug taxi kansang kinitaan nagsalig sa gidaghanon ug kapaspas sa biyahe siguradong mayayay ug mosamot nga wa nay pahuway. Unya kitang mga pasahero ug ubang motorista magsugod na sab ug adjust sa oras padung sa trabahoan ug ubang appointment nga adtoan. Segurado ko nga ang trapik nga nasinati nato sa nangaging mga bulan doblihon pa kung makumpleto na ug abli ang tanang eskwelahan dinhi sa ato.
Kamong mag-agian diha Minglanilla padung sa Talisay City naa ba mo’y namatikdan nga kalihukan pagpagaan sa bul-og sa trapiko diha? Sa North Road sa Mandaue City wa ko’y nakita nga kalainan. Ug sa ubang karsada sa Metro Cebu area zero kung pagpaluag sa karsada ang husgutan. Nganong zero? Naa pa man ang daghang obstruction sama sa iligal nga pagparada. Mga eskina nga namuwak sa tinda. Mga sidewalk nga gialihan ug mga negosyo. Labaw sa tanan ang mga kawot sa karsada nga way kahumanan. Pun-an pa sa mga way disiplina nga mga driver magsigi nalang gyud ta ug ka- late sa trabaho ug usahay mangapasmo pa. Dunay nagsugyot nako nga unta kadtong di pa kaayo hanas nga traffic enforcer mahimo ba nga bansayon una ug maayo usa idistino sa mga trapik nga lugar. Inay magpaluag sa trapiko mao man hinuoy makapasamot sa trapik.