I hold tighter to my faith
Miseryuso ko pag-ayo samtang gikuptan ko ang duha ka kamot ni Belle. “Gisakitan sab ko, Belle. Sakit kaayo ning ma- frustrate ta sa love, uy! You know, giagwanta ko lang ang pait sa maong kapakyasan. But like you, di sab ko gustong duha mi ka babaye nga gimahal ni Albert.” “Di ba matawag man tang
selfish ani, Te Nicole?” “Well, di man selfish nang mobarog ta sa atong pagtuo. Sa maong sitwasyon nga naguol gyud ko sa among panagbuwag ni Albert, mihawid gyud ko pag-ayo sa akong pagtuo sa Diyos nga siya ang nagbuot kon kinsa ang laki nga para nako.”
“Salamat, Te, ha, sa imong suportar. Sa imong pag-unong nako ning panahon nga nia ko sa kaguol.”
Mikatawa ko. Gipikpik ko na sab og hinay ang abaga sa akong manghod.
“Aw, natural lang na. Aside nga duha ra tang magsuon, parehas sab tang babaye nga nakahibawo sa atong gibati kon ang hisgotan mao ang bahin sa lovelife.”
Wa na maghilak si Belle. Ning higayona, nagpahiyom na siya. Nagkig-aper pa gani siya nako.
Sayo kong misulod sa akong kuwarto pagkahuman namog panihapon. Bisag gidawat ko na ang among panagbuwag ni Albert apan di gyud nako kalikayan nga mahunahuna ko siya. Di siya daling makalimtan labi na nga siya ang akong unang gugma. Sa hayskol pa mi, daan na kong nakagusto niya. Nagkaklasmet man gud mi gikan sa first year hangtod na sa fourth year. Lain-lain ang lugar nga among gipuyan apan usa ra ka eskuwelahan ang among gitunghaan. Nagkasuod mi. Ug dihang iya kong gipangulitawhan, gisugot dayon nako siya.
Sa sinugdanan very smooth ang among relationship. Apan sa nadugay na, nakigrelasyon siya og laing girl nga dancer sa among eskol. Gisakitan gyud ko pag-ayo apan nausa ang akong desisyon nga makigbuwag ko niya.
Ug karon, ang akong manghod na sab ang nabiktima sa kapalikero sa lalaki. Nuon, parehas sila si Albert ug Arnel, duulon og babaye kay guwapo man sila. Gikan pa gyud sa pamilya nga mga maayo ug relihiyuso. Apan lagi, kining
nature sa lalaki nga di makontentog usa lang ka babaye, mao ang nahitabo nila ni Albert ug Arnel. (SUMPAYAN)