Tulo ka libakera
Lunes. Alas utso sa buntag. Usa na ka oras silang nagbarog sa daplin sa highway atubangan sa munisipyo. Moadto sa siyudad silang Vina, Lira ug Aniceta. Sakay kaayo basta Lunes. Puno sa pasahero ang tanang bus, mini-bus ug dyip depasaheroan nga nangagi sa ilang tungod. Dayon may Mitsubishi Adventure nga maroon nga miurong sa intersection sa highway gikan sa dalan luyo sa munisipyo. Si Charlie, ilang silingan, ang nagmaneho. Gisenyasan ni Vina nga mang- hitch-ride sila. Gikamay sila ni Charlie nga usa ka CPA nga may opisina sa Park Mall.
Nanagpahiyom sila ug lagsik nga nanglakaw padulong sa sakyanan. Apan paghiabot nila tungod sa sakyanan nagpanagana silag sakay. Nalipat sila, kay may atraso man diay sila sa asawa ni Charlie nga si Myrna.
“Sakay na mo. Sa siyudad man kaha mo? Pero kutob ra ko sa Park Mall,” ni Charlie nga nagpahiyom.
“Wa tingali mosumbong ang asawa sa iyang bana,” maoy didto sa hunahuna ni Vina. Gisenyasan niya ang duha ka kauban nga manakay na sila.
Si Lira diha lingcod sa front seat. Sila si Vina ug Anita didto sa luyo.
“Malipay sab ko nga makashare a ride ninyo. Laay man sab nga ako lang pirme mag-inusara sa biyahe. Way ika-estorya,” ni Charlie. Gipaarangkada niya ang sakyanan. Sa gilay-on nga 40 kilometros duha ka oras ilang biyahe tungod sa trapik.
Mapasalamaton ang tulo ka babaye. Si Anita, ang kinamaguwangan, biyuda na. May gipatinda si Myrna kaniyang ukay-ukay balig P5,000, way nabalik. Si Vina, manghod ni Anita, ang iyang bana tua sa Dubai, welder. Gi-payret niya ang suking labandera ni Myrna. Giintrigahan pa gyud nga tihik ug garbosa si Myrna. Si Lira, ang labing batan-on sa tulo, asawa ni Bonnie nga kinamanghurang igsuon ni Anita. Nagpanagana sab si Lira paglingkod sa front seat ganiha kay dunay guilt feeling. Utangan siyag beauty products kang Myrna balor sab og P5,000. Unya gipanabi pa ni Lira sa mga magtutudlo nga kauban ni Bonnie nga si Myrna bigaon, kay nangabit og batan-ong lalake.
“Tsika-tsika lang ta sa biyahe. Way laing makadungog nato kon manglibak ta karon,” ni Charlie.
Nangahilom ang tulo. Naigo sa pulong ni Charlie, kay sila ang hawod nga mga libakera sa ilang barangay. Anha sila manglibak sa madyungan kay puro sila sugarol. Adik sila sa madyong o bisan unsang sugal sa baraha. Maong way kuwarta nga paigo nila. Nangahente silag yuta. Gani karon, duna silay kasabot nga ahente sa buyer sa ilang stock. Mosumitir silag papeles.
“Ang maayo nga panglibak, kanang dayeg, dili saway,” ni Charlie nga nagtan-aw sa karsada sa unahan.
“Bitaw!” ni Anita nga nagpasiklap kang Vina nga diha sa iyang wala.
“Kanang mosulti ta og negative batok sa atong isigka tawo, mosumbalik ra na nato. Kita ray masakitan,” ni Charlie. “Mao ba?” ni Vina. “Kanang akong asawa, si Myrna, magsigeg panghimaraot sa mga tawong may atraso niya. Akong gibadlong. Akong giingnan, ayaw gyud pagbuhata na kay ikaw ray madaot ana. Tun-i ang pagpasaylo,” ni Charlie.
Nangahilom pagsamot ang tulo. Nasayod karon sila nga gipanghimaraot sila ni Myrna.
“Akong prinsipyo karon nga tiguwang na ko ug nangapo na mao ang ‘forgive and forget.’ Avoid bad feelings. Good feelings attract good things. Bad feelings attract bad things. Busa, ayaw gyud mo anang pagdumot, kasuya, kalagot ug tanang dautang pagbati. Maka-kanser na!”
Ang tulo ka libakera karon pa makaamgo nga buotan ang ilang silingan nga naapil lang sa libak tungod sa asawa nga garbosa, mapahitas-on ug estrikta. Dili gayud diay angay tuohan ang libak.
(KATAPUSAN)