2 ka scholars sa AboitizPower migraduwar nga cum laude
Duha sa pito ka mga iskolar sa AboitizPower na mitapos sa miaging Marso migradwar nga cum laude gikan sa Cebu Institute of Technology-University (CIT-U)
Ang mga iskolars nakadawat ug full tuition, hinabang para palit ug mga libro ug binuwan na pang-gastos gikan sa AboitizPower ug sa subsidiary niini nga ang Therma Visayas, Inc. (TVI).
Matud sa AboitizPower, nangandam na sad sila para sa iskolars karong umaabot na semester kabahin sa Purposive Scholarship Program sa TVI na motabang sa mga 4th ug 5th year na engineering students na makapasar sa ilang assessment.
Ang mga iskolar na milampus nga cum laude mao silang Samuel Loyloy ug Paul James Libron. Si Loyloy nakahuman sa kursong electrical engineering ug si Libron milampus sa mechanical engineering sa CIT-U.
Migradwar usab sa CIT-U ang ubang AboitizPower iskolars nga Cheryl Marie Panonce, BS Electrical Engineering; Chezca Mendez, BS Electrical Engineering; James Kenneth Catalonia, BS Electrical Engineering; and Stan Mykel Delfin, BS Mechanical Engineering.
Milampus sad atong Marso gikan sa University of San Carlos, si Kelvin Garlet, sa kursong electrical engineering.
Mipasalamat og daku ang mga iskolars sa AboitizPower ug sa TVI.
“Tungod sa scholarship, among gidoble ang among paningkamot,” matud ni Libron.
Niingon si Loyloy nga nakasalvar kaniya ug sa iyang pamilya ang hinabang sa AboitizPower. “Pinaagi sa hinabang sa AboitizPower, naka-focus ang akong ginikanan sa gastosan sa eskuylahan sa akong mga manghud,” matud niya.
Matud ni Alexander Asuncion, AboitizPower corporate services head (generation group), ang AboitizPower motabang sa mga estudyante na may katakos ug kugi nga motiwas sa kursong engineering para motabang sa ilang pamilya ug sa ekonomiya sa nasud.
Ang AboitizPower usa sa mga dako nga kumpaniya sa kuryente sa Pilipinas ug nagtukod sa 340-MW na baseload power plant sa Barangay Bato sa syudad sa Toledo.