AUSSIE SPARMATE BILIB NI PACQUIAO

Mibilib si Australian boxer George Kambosos, Jr. sa kusog ug kaabtik ni Manny Pacquiao sa iyang pagpakigsa Pambansang Kamao sa Pilipinas.

Si Kambosos, 23, miabot sa Manila niadtong Biyernes kuyog ang adviser ni Pacquiao nga si Michael Koncz.

Gikuha sa kampo ni Pacquiao si Kambosos gumikan kay aduna kini susama og estilo sa umaabot nga kontra sa fighting senator nga si Jeff Horn, kinsa usa sab ka Australian.

Depensaan ni Pacquiao ang iyang World Boxing Organization (WBO) welterweight title batok kang Horn karong Hulyo 2 sa Suncorp Stadium sa Brisbane, Australia.

“It’s a big honor on my part to be a sparring partner of Manny Pacquiao who is a legend in the sport of boxing,” matod ni Kambosos sa interbyu sa www.philboxingcom.

Si Kambosos adunay 5’9” nga gitas-on ug wala’y pilde sulod sa 12 ka mga away.

Nagkanayon si Kambosos nga nakabintaha si Pacquiao kumpara kang Horn sa kaabtik ug kasinatian.

“Manny Pacquiao is a lot more experienced as a fighter, he’s so fast and his fighting style is unpredictable. But I expect Horn to also be at his best come fight night,” dugang ni Kambosos.

Usa si Kambosos sa tulo ka mga boksidor nga gika-sparring ni Pacquiao niadtong Sabado.

Ang training camp ni Pacquiao gibalhin na sa General Santos City.