2 KA DAPIT SA DANAO NAIGO SA ALIMPUS

Pipila ka mga barongbarong sa coastal area sa sityo Ambograw, brgy. Suba ug sa brgy. Taytay, siyudad sa Danao, nangagusbat human niigo ang alimpus o kusog nga hangin pasado alas 7 niadtong Lunes sa gabii.

Ang labaw sa Danao City Disaster Risk Reduction and Management Office, Konsehal Roland Reyes, niingon nga kusog lang nga hangin gikan sa baybayon ang miigo ug wala ra hinuon kini dala nga tubig.

Di pa makatumbok si Reyes kon pila ang danyos sa hitabo ug pila ang mga balay nga naguba sanglit nagpadayon pa ang damage assessment sa duha ka mga barangay.

Hinuon sa brgy. Taytay, gitug-an niya nga sementeryo maoy naapektohan ug di residential area.

Human sa katalagman niadtong Lunes sa gabii, gipabakwit una ang mga residente samtang dunay usa kanila ang gidala sa tambalanan human naglisud sa pag-ginhawa. Duna say mga nakaangkon ug ginagmay nga mga pangos.

“According sa nakakita, diha gyud daw sa dagat nagsugod ang ipo-ipo. Near the coast pero wa gyud nakabuelo gikan sa tunga-tunga. Kaluoy sa Ginoo, hangin ra,” pasabot ni Reyes.

Ang Provincial Disaster Risk Reduction and Management Office(PDRRMO), pinaagi sa labaw sa Emergency Response nga si Rhafael Luche,niingon nga ang alimpus o tornado komon nga mahitabo kon dunay mga pag-ulan ug dunay panugdog ug kilat.

Mosamot pa kini nunot sa hanging habagat nga maoy nagpatigbabaw ning panahuna.