8 ka buwan way suweldo; kaon pinunit

Sud sa walo ka buwan, wa sweldoi si Simplicio Danatil, Overseas Filipino Worker ug taga Barangay Lawaan II, dakbayan sa Talisay, sa kompaniya nga iyang gialagaran didto sa Jeddah, Saudi Arabia.

Ang gobiyerno na sa Pilipinas ug Saudi ang nagpakaon ug nagsuporta nila.

“Og way hinabang ang gobiyerno ug kompaniya, wa mi kaon,” pagtug-an ni Danatil sa Superbalita Cebu.

Aron dili magutman, ang ilang gibuhat moadto sa usa ka mall sa Jeddah ug didto mag-atang sa dapit diin ilabay ang mga pagkaon nga hapit na ma-expire ug mangadaot.

Si Danatil niasoy nga niadtong Mayo sa miaging tuig pa siya katapusang nakadawat og sweldo gikan sa ilang employer isip bombero sa usa ka construction site.

Nirason ang ilang employer nga maglisod na kini og sweldo nila tungod sa kadaghan nilang mga trabahante.

Ug sukad wa siya masweldoi, nagpabilin na lang siya sa kampo sud sa compound sa construction site nga ilang gitrabahoan kuyog sa ubang mga OFW ug ubang trabahante gikan sa ubang kanasuran.

Di usab siya mahimo motrabaho og laing kompaniya kay na- expire na ang iyang Iqama nga residence permit alang sa mga langyaw nga nanarbaho sa Saudi.

Gumikan sa ilang kahimtang, nakahukom ang kagamhanan sa Pilipinas sa pakigtambayayong sa gobiyerno sa Saudi Arabia nga papaulion sila dinhi sa nasod.

“Si President (Rodrigo) Du- terte ang nitabang namo nga makauli mi diri,” sugilon niini kinsa nauli sa Sugbo kauban ang laing mga OFW niadtong Nobiyembre 2016.

Si Danatil, ang usa sa 20 ka OFWs nga mga Sugboanon nga nakadawat og tag P20,000 nga tabang pinansiyal gikan sa kagamhanan sa lalawigan sa Sugbo.

Ang pag-apud-apod og tseke pangulohan ni Gob. Hilario Davide III ug Bise Gob. Agnes Magpale gihimo human sa regular session sa Sangguniang Panlalawigan sa Sugbo niadtong Lunes sa Legislative Building sa Kapitolyo.

Bisan sa nasinati sa Saudi, gusto gihapon si Simplicio nga mobalik og trabaho didto ug manimpalad og laing kompaniya. Nangaply usab siya og laing agency aron mosuway og trabaho sa New Zealand ug Canada.

Niadtong Hunyo 2014, nagsugod og trabaho ang 48-anyos nga amahan sa duha ka mga anak sa Taif, Saudi Arabia isip usa ka construction worker.

Wala pa mahuman ang iyang kontrata gibalhin siya og laing kompaniya sa Jeddah. /

/ Sheila C. Gravinez ■ HINABANG. Si Simplicio Danatil (ikaduha gikan sa tuo) midawat sa P20,000 nga hinabang gikan sa Provincial Government. Nagtan-aw sila si Gobernador Hilario Davide III (ikaduha gikan sa wala) ug Bise Gobernador Agnes Magpale (wala).