HEPE SA MINGLA HOSPITAL NAKALAPAS SA POLISIYA
Nakalapas sa nasudnong polisiya sa Department of Health bahin sa pagpagamit og ambulansya ang gisuspenso nga chief of hospital sa Minglanilla District Hospital, lungsod sa Minglanilla.
Kini ang gibutyag ni Provincial Health Officer Rene Catan atol sa regular session sa Sangguniang Panlalawigan sa Sugbo niadtong Lunes, diin gipatawag ug gipangayoan og katin-awan sa pagdumili ni Dr. Bella Villaganas pagpagamit og ambulansya ngadto sa wa mailhing lalake nga biktima sa hit-and-run nga namatay niadtong Mayo 24, 2017.
Atubangan sa mga sakop sa Provincial Board, si Catan namahayag nga nahisupak sa Administrative Order No. 2010-0003 nga pirmado ni kanhi Health Secretary Francisco Duque nga pinetsahan og Enero 7, 2010, ang giluwatan nga memorandum ni Villaganas nga ipagamit lang ang ambulansya sa district hospital kon maghatod og pasyente sa laing tambalanan sa siyudad sa Sugbo.
Sa administrative order ni Duque, ang ambulansya gamiton sa paghatod og pasyente gikan sa dapit nahitaboan ngadto sa emergency room sa ospital aron matambalan, pagbalhin sa pasyente ngadto sa laing ospital alang sa diagnostic ug pagtambal nga katuyoan, ug special health service nga naghatag og emergency medical care and life support sa pasyente.
Apan sa memorandum ni Villaganas kini nagmando nga ipagamit ang ambulansya sa district hospital sa mas grabe nga kaso sa pasyente nga manginahanglan og ambulansya.
Matod niya mahimong magamit ang ambulansya sa hospital personnel kon dunay opisyal nga katuyoan sa Kapitolyo, magpalit sa kinahanglanon nga mga gamit sa tambalanan ug kon dad-on ang pasyente sa laing ospital alang sa diagnostic o laboratory exams.
Tungod niini, si Villaganas gisuspenso sud sa 60 ka adlaw ug temporaryo nga gihulip niya si Dr. Ian Genaldo.
Matod ni Catan apil sa gisuspenso ang job-order nga nars nga si Dave Zomiel Arellano, kinsa maoy nibalibad sa usa ka Marvey Bastida Cano nga nihangyo nga gamiton ang ambulansya aron respondihan ang usa ka biktima sa hitand-run.
Ang duha gipaubos na sa imbestigasyon sa Committee on Discipline and Investigation sa Kapitolyo nga maoy mohatag og rekomendasyon ngadto sa gobernador alang sa aksyon nga himuon.
Hangtod karon wala pa mailhi ang patayng lawas sa bikitma.