Hugot nga seguridad sa mga mall: Osmeña

Gitagbo ni Mayor Tomas Osmeña ang mga pangulo sa security personnel sa mga mall, hotel ug restaurant sa tinguha nga mapahingusgan ang seguridad ug matugotan ang mga pulis nga makasulod dala ang ilang mga armas.

Lakip usab sa nahisgutan ang mga sibilyan nga adunay permit to carry firearms outside residence (PTCFOR) para sa mas hugot nga seguridad ug mapugngan ang posibleng pag-ulbo sa kagubot sama sa nahitabo didto sa Resorts World Manila.

Ang lone gunman nga adunay M4 (armalite), nakasu- lod sa RWM nga wala masita sa gwardiya ug nisunog sa casino area ug nipusil sa parti sa hotel nga walay bisan gwardiya nga nakapusil niini.

Sa tigom, gipadayag ni Osmeña nga nitumaw ang suggestion nga tugotan ang mga pulis nga naka-uniporme o nakasibilya lakip na kadtong mga private individual nga adunay PTCFOR nga mokuha og identification card gikan sa establishment.

Di mominos 25 ka mga security head ang gitapok ni Osmeña ubos sa pagpaninguha ni Konsehal Dave Tumulak nga maoy iyang deputy mayor for police matters aron dili mahitabo dinhi sa Sugbo ang gidangatan sa RWM diin adunay kakuwangan ang mga gwardiya.

Si Osmeña pabor nga ang mga sibilyan nga adunay mga PTCFOR makadaladala sa ilang armas bisan asa sanglit iyang gihulagway nga dako sila og ikatabang sa pagpatuman sa seguridad ug dili angay mabalaka ang publiko sanglit ang maong mga tawo disiplinado ug dili mga abusado hinungdan nga nakakuha sila og PTCFOR.

Moabot ngadto sa 37 ka kinabuhi ang nakalas sa nahitabo sa Resorts World Manila.