Tungod sa social media

Sa wala pa gibutyag ni Lt. Col. Jo-Ar Herrera, tigpamaba sa 1st Infantry Battalion, ang bahin sa ilang napalgan nga P52.2 million cash ug P27 million nga kantidad sa tseke sa gilubloban sa Maute group sa dakbayan sa Marawi, ang hulagway sa binandul nga kuwarta gipasapasa na sa social media ug nag- trending. Nabaniog bisan wala pay opisyal nga pamahayag ang armadong kusog sa nasod. Ug nisunod ang pamahayag ni Herrera nga nagkompirmar sa taho.

Kinsay nag- upload sa hulagway? Sumala sa tinubdan sa Superbalita sa Marawi, nahimong istorya sa sulod sa tropa sa kagamhanan nga ang ultimo nga sundalo ang nagpasa niini sa social media tungod sa kabalaka nga "ma- solo" sa ilang labaw ug dili mabutyag ang kinatibuk-ang kantidad. Tinuod o dili ang maong istorya apan mapasalamaton kita nga nabutang kini sa internet ug napakgang ang posibleng salaud nga mabuhat mugna sa pagkabuta sa makabungog nga kadako sa salapi.

Si Lt. Gen. Carlito Galvez, commander sa Western Mindanao Command, niingon nga ang cash ug checks ilang nakaplagan atol sa house-to-house clearing sa Marines pipila ka barangay sa Marawi. Matod ni Galvez, ang cash ug checks gikatakdang i- turnover sa tukma nga ahensiya sa kagamhanan samtang ang awtoridad mopahigayon og lawom nga imbestigasyon aron pagsubay sa tinubdan sa kuwarta sa bandidong grupo.

Si Brig. Gen. Joselito Rolando Bautista, commander sa Task Force Marawi, niingon nga ang pagpakita sa dakong kantidad timailhan nga sayop ang akusasyon sa pipila nga ang mga sundalo nanglungkab sa Marawi ug ang AFP dili motugot niini.

Tungod sa social media, napaduol kita sa dapit nga nahitaboan ug nasayod sa labing ulahing panghitabo pinaagi sa usa ka klik lang sa tudlo, sama sa kagubot sa Marawi ug ubang bahin sa kalibotan. Apan magbantay usab kita sa pagdawat sa mga taho nga posibleng "mini" o dili tinuod ug ginamagama lang. Responsable sa atong reaksiyon.