Unsay hinungdan sa pagka-wala?

Reward money na sab! Matod pa sa balita, mohatag og reward si Presidente Rody Duterte buhi o patay alang kanila ni Isnilon Hapilon ug ang mga managsuon nga Maute nga sila si Omar og Abdullah. P10 miyones alang kang Abu Sayyaf leader Isnilon Hapilon og tag P5 milyones kada usa nila ni Omar ug Abdullah Maute, matod pa sa presidente. Kon atong mahinumdoman, mihatag sab ang presidente og reward money alang sa mga Abu Sayyaf sa Bohol kaniadtong miaging bulan. Usa ka milyon sa kada usa sa Abu Sayyaf nga madakpan, buhi o patay. Apan unsay nahitabo? P450,000 ra, imbes P1 milyon, ang nadawat sa mitabang sa mga military ug police nga madakpan ang mga Abu Sayyaf.

Og ang nakapait pa gyod, ang tawo nga mitultol sa mga kapolisan sa kweba nga gitagoan sa mga Abu Sayyaf didto sa lungsod sa Clarin, Bohol wala gyod hatagi sa iyang angay nga madawat. Hangtod karon.

Ang nakadawat og P450,000 mao ang habal-habal driver nga gisakyan sa usa sa upat nga Abu Sayyaf. Ang habal-habal driver maoy mi-report bahin sa iyang pasahero ngadto sa kapolisan. Apan ang tawo nga mitultol mismo sa mga kapolisan sa kweba diin didto maglublob ang mga Abu Sayyaf wala na hinuon hatagi sa reward money nga kon hunahunaon, mas delikado og mas importante ang impormasyon sa maong tawo. Angay unta bahinan sab ang maong tawo sanglit nakatabang man siya sa pagdakop patay sa mga Abu Sayyaf.

450 ka mga sugarol dili na pasudlon sa mga casino, matod pa sa PAGCOR. Katawanan kining maong balita. Unsa man diay ang tawag sa mga tawo nga mosulod sa mga casino, turista? Kanus-a tawgon ang usa ka tawo nga sugarol, kon mosugal siya ka usa, ka duha, ka tulo, ka upat? Kadtong mga tawo nga mosulod kay magdula-dula lang, tawgon ba usab sila nga sugarol? Kon dili na pasudlon ang mga sugarol sa mga casino, unsaon na lang ang negosyo sa mga casino? Unsay tinuod nga hinungdan nga taod-taod na nga nawala sa Bohol si Governor Edgar Chatto? Gani, sa pagbalik sa opisina ni Vice Governor Dioning Balite kaniadtong miaging semana human mo-issue og TRO ang Court of Appeals sa suspension order sa Ombudsman, deretso siya nga gitawag og Acting Governor sanglit tua kuno si Gov. Chatto sa Manila. Gaunsa diay si Gov. Chatto didto sa Manila og sobra sa usa ka semana na? Nag-follow-up sa mga proyekto sa Bohol? Unsa ka tinuod ang balita nga naospital si Gov. Chatto? Kon tinuod kini, unsa man ang hinungdan sa pagka-ospital? Hangtod kanus-a siya sa maong ospital? Nganong dili man tug-anan ang mga katawhan sa tinuod nga sitwasyon sa panglawas ni Gov. Edgar Chatto?