I hold tighter to my faith

Hingpit nga nawala ang akong gugma kang Albert sa misunod nga mga adlaw. Ug si Belle, kanunay nang nagmalipayon. Sa akong pagtuo, hingpit na sab siyang nakadawat nga si Arnel di para kaniya. Ambot ba sab ning gugma, uy? Weder-weder lang gyud. Dunay panahon nga nindot, may panahon sab nga ngil-ad. Aw, mao man gyud tingali ni. Kalipay ug kasakit ang naglambigit gyud sa lovelife sa tawo.

Morag sugal ning pagpakigrelasyon sa usa ka binuhat. Debuynas ug demalas ra ang padulngan. Ug sa among paghigugma ni Belle kanila ni Albert ug Arnel, demalas ang among nahiagoman. Apan para nako, moabot gyud ang suwerte para namo ni Belle. Moabot gyud ang lalaki nga para gyud namo.

Ug kining pagtuhoa, kanunay nakong gihunahuna. Ang dako kong pagtuo ug pagsalig sa Diyos maoy nakapalig-on nako bisan pa sa masakit nga kapakyasan ko sa gugma.

Usa ka Domingo, nagkanta-kanta si Belle paggawas niya sa banyo. Mao pay pagkahuman niyag kaligo. Hapon niadtong tungora. Mikidhat pa siya nako. “Duna koy date, Te Nicole. Adto mi mag- dinner sa gawas.”

“Na- in-love na sab ang akong manghod.” Gikidhatan ko sab si Belle.

“Bitaw, Te, uy. Di man lang gyud mahibaw-an nga mahigugma tag usab human sa atong frustration sa gugma. Ikaw, Te? May nangulitawo na ba nimo?”

“Naay daghan, uy. But gisnub ko sila. Wa man koy nagustohan nila bisag usa.”

“Moabot ra siya sa imong kinabuhi, Te. Di ba mao may imong pagtuo nga ang Diyos maoy maghatag og destiny sa tawo?”

Gipahiyoman ko si Belle dayon kong tando.

Ako ug ang among katabang ra ang nahabilin sa among balay. Sila si Mama ug Papa duna say gilakaw. Mitambong sila og birthday party sa ilang suod nga kaila. Gilayaan ko. Misulod na lang ko sa akong kuwarto aron maghigda-higda hangtod nga makatulog ko. Apan misulod si Nang Meling, ang among katabang, sa akong kuwarto.

“Day Nicole, naa kay bisita. Gipahuwat ko siya sa sala.”

“Bisita?” Nadiyong ang akong mga mata kay wa koy nahibaw-an nga dunay mamisita nakong lalaki ron. “Kinsa man, Nang?” “Si Arnel, Day.” Nahakalit kog bangon tungod sa kakugang. Wa ko makatingog.