Mituo sa pagtulon-an
“N asayod ka ba, Brod, nga dili ka makalabang sa mao gihapong sapa sa duha ka higayon?” sukot ni Danny kang Nilo samtang nagdungan sila pagtabok sa Cantumog River sa dapit nga ubos lang sa tuhod ang tubig. Ning buntaga miubog sila sa sapa padulong sa pikas tampi nga sakop na sa barangay Cantipay.
“Wa gyud ko masayod, Brod. Sa ato pa, kon mobalik ta sa atong agi, lain nang sapa ang atong natabok?” ni Nilo.
“Maingon-ingon ana, Brod. Sa Iningles pa, You cannot cross the same river twice,” ni Danny. ‘Brod’ ilang tawganay tungod sa ilang kasuod. Mora silag magsuon. Hapit gani sila nga managkaluha kay nagsunod ang petsa sa ilang natawhan. Kang Nilo, Disyembre 10; kang Danny, Disyembre ll sa samang tuig. Maguwang lag usa ka adlaw si Danny kang Nilo. Parehas silag kinaiya, hingamigo, mahilig sa musika ug kamao motukar og sista. Kasagaran mag- jamming sila sa adlawng Sabado ug Dominggo.
Naglahi lang ang ilang edukasyon. Klasmet sila sa elementarya sa Carmen Central School. Si Danny taga Baring; si Nilo taga Cogon West. Apan pagka human nila sa elementarya wa na mopadayon pag-eskuwela si Nilo. Gihimo siyang enkargado sa iyang ginikanan sa ilang kalubihan ug kamaisan sa Cantipay. Mangadto sila karon sa kamaisan kay manganag. Si Danny nahimong CPA. Apan bisan pa sa gintang sa ilang grado wa gyud mausab ang ilang panagsuod.
Puro na sila minyo ug may mga anak nga nagungha pa sa Carmen Central School.
“Ako, Brod, ubos kaayo og grado. Dili gyud ko katugkad sa imong kaalam, unsa may gipasabot nimo mahitungod adtong pagtabok sa sapa?” ni Nilo samtang nagtayhop sa gihaling nga daob nga nagsugod nag siga. May napulo na nga pinakpakang mga anagon nga diha sa ibabaw sa gihaping mga dahon sa mais.
“Ang tubig sa sapa nagdagan padulong sa dagat. Inig ubog nimo aron motabok ang tubig nga midapat sa imong lawas nilabay na. Unya kon mobalik kag tabok, lain na sang tubig ang modapat sa imong lawas,” ni Danny.
“Busa, you cannot cross the same river twice!” ni Nilo nga nakayango.
“Pero may mas lawom pa nga kahulogan,” ni Danny nga nagyaka sa balili.
“Unsa man?” ni Nilo. Gibungkag niya ang daob aron makatag ang baga.
“Nagdagan ang panahon. Kon unsay tinuod gahapon di na tinuod karon. Kon unsay tinuod karon di na tinuod ugma. Nag-irog ang kamatuoran!” ni Danny.
“Sama pananglitan sa…” ni Nilo nga mikunot ang agtang.
“Kanang giingong Hesukristo nga nagpakamatay tungod sa atong sala, di na tinuod. Tinuod lang na sa panahon kanus-a siya namatay alang sa sala sa mga tawo nga buhi niadtong adlawa. Wa pa ta makasala sa panahon ni Hesukristo,” ni Danny.
“Di diay ka motuo kang Hesukristo?” ni Nilo.
“Nagtuo ko sa Iyang mga pagtulon-an. Apan ang iyang kamatayon alang lang sa mga tawo sa iyang panahon,” ni Danny.
Nakahangad si Nilo sa langit ug nakahinuktok. Unya miyango-yango siya. Nakasabot siya sa gipamulong ni Danny.
(KATAPUSAN)